കൊല്ലം∙ ഓച്ചിറ ആലംപീടികയിലെ ബവ്റിജസ് ഔട്ട്‌ലെറ്റിൽ മോഷണം. രണ്ടര ലക്ഷത്തോളം രൂപ നഷ്ടപ്പെട്ടതായാണ് പ്രാഥമിക വിവരം. മദ്യം മോഷണം പോയിട്ടുണ്ടോ എന്ന് സ്റ്റോക്ക് വിവരങ്ങൾ ശേഖരിച്ചെങ്കിൽ മാത്രമേ അറിയാനാകൂ. ബവ്റിജസിൽ ഇപ്പോഴും പരിശോധന തുടരുകയാണ്. ഇന്നലെ ഈ ഭാഗത്ത് കനത്ത മഴയായിരുന്നു. ആ സമയത്താകാം മോഷണം നടന്നത് എന്ന നിഗമനത്തിലാണ് പൊലീസ്.

 

മോഷണത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. ഹെൽമറ്റും മഴക്കോട്ടും ധരിച്ചാണ് മോഷ്ടാവ് അകത്ത് കയറിയത്. ബവ്റിജസ് ഔട്ട്‌ലെറ്റ് പ്രവർത്തിക്കുന്ന കെട്ടിടത്തിന്റെ മുകൾ നിലയിലെ എക്സ്ഹോസ്റ്റ് ഫാൻ ഇളക്കിമാറ്റിയതായി കണ്ടെത്തിയിട്ടുണ്ട്. ഇതുവഴിയാകാം മോഷ്ടാവ് അകത്തു കടന്നതെന്നാണ് പൊലീസിന്റെ പ്രാഥമികനിഗമനം. ഇന്നലെ ഈ ഭാഗത്ത് കനത്ത മഴയായിരുന്നു. ആ സമയത്താകാം മോഷണം നടന്നതെന്ന് പൊലീസ് പറയുന്നു.‌

 

ബാങ്കിൽ അടയ്ക്കാനായി സൂക്ഷിച്ചിരുന്ന പണമാണ് നഷ്ടമായത്. 3 ദിവസം ബാങ്ക് അവധിയായിരുന്നതിലാണ് പണം ഇവിടെ സൂക്ഷിച്ചിരുന്നതെന്ന് അധികൃതർ പറഞ്ഞു. 3 മാസത്തിനു മുൻപ് കരുനാഗപ്പള്ളിയിലെ ബവ്റിജസ് ഔട്ട്‌ലെറ്റിലും സമാനമായ രീതിയിൽ മോഷണം നടന്നിരുന്നു.