കൊല്ലം ∙ വനിതാ ഡോക്ടറെ ഹോട്ടൽ മുറിയിൽ മർദിച്ച സംഭവത്തിൽ സുഹൃത്തായ ഡോക്ടറെ കൂടുതൽ തെളിവെടുപ്പിനായി കസ്റ്റഡിയിൽ വാങ്ങുമെന്ന് അന്വേഷണ ഉദ്യോഗസ്ഥർ. കൊല്ലത്തെ ആശുപത്രിയിലെ ഡോക്ടറായ തിരുവനന്തപുരം പട്ടം സ്വദേശി അജാസ്ഖാനാണ് (29) റിമാൻഡിൽ കഴിയുന്നത്. കഴിഞ്ഞ ചൊവ്വാഴ്ച രാത്രി 12.20ന് കൊല്ലം നഗരത്തിലെ ഒരു ഹോട്ടലിലാണ് കേസിനാസ്പദമായ സംഭവം.

 

വനിതാ ഡോക്ടർ എറണാകുളം സ്വദേശി അലീന മാർഗ്രറ്റ് സഖറിയയും (28) അജാസ്ഖാനും പഠനകാലം മുതൽ സുഹൃത്തുക്കളാണെന്നാണ് പൊലീസ് പറയുന്നത്. സംഭവ ദിവസം ഹോട്ടൽ മുറിയിൽ എത്തിയ ഇരുവരും തമ്മിൽ വാക്കേറ്റം ഉണ്ടാകുകയും മർദനത്തിൽ കലാശിക്കുകയുമായിരുന്നു. മർദിക്കുന്ന ദൃശ്യങ്ങൾ അജാസ്ഖാൻ മൊബൈൽ ഫോണിൽ പകർത്തി വീട്ടുകാരെ കാണിച്ചെന്ന പരാതിയുമുണ്ട്.

 

സംഭവദിവസം രാത്രി മുറിയിൽനിന്നു സ്ത്രീയുടെ നിലവിളി കേട്ട ഹോട്ടൽ ജീവനക്കാർ വിവരം അറിയിച്ചതനുസരിച്ചു കൺട്രോൾ റൂം പൊലീസ് സ്ഥലത്തെത്തി. മുറി തുറന്ന് അജാസിനെ പിടികൂടാൻ ശ്രമിച്ചെങ്കിലും ഇയാൾ പൊലീസിനെ അസഭ്യം പറയുകയും ആക്രമിക്കുകയും ചെയ്തു. തുടർന്ന് കൂടുതൽ പൊലീസ് സ്ഥലത്ത് എത്തിയാണ് ഇയാളെ കീഴ്പ്പെടുത്തിയത്. ഇരു ഡോക്ടർമാരും താമസിച്ചിരുന്ന മുറിയിൽ നടത്തിയ പരിശോധനയിൽ 3 ഗ്രാം കഞ്ചാവും ഇതു വലിക്കാൻ ഉപയോഗിക്കുന്ന പ്രത്യേക തരത്തിലുള്ള പേപ്പറും കണ്ടെത്തി. വനിതാ ഡോക്ടറെയും പൊലീസ് ഉദ്യോഗസ്ഥനെയും മർദിച്ചുവെന്ന പരാതിയിലാണ് അജാസിനെ റിമാൻഡ് ചെയ്തത്. കഞ്ചാവ് കൈവശം വച്ചതിന് വനിതാ ഡോക്ടറെ അറസ്റ്റ് ചെയ്ത് ജാമ്യത്തിൽ വിട്ടയച്ചിരുന്നു.