കോഴിക്കോട് ∙ വിവാദമായ മുട്ടിൽ മരംമുറിക്കേസിനു വഴിയൊരുക്കിയ റവന്യു ഉത്തരവ് പുറപ്പെടുവിച്ചതിലും അതിനുശേഷമുള്ള നടപടികളിലും ഗുരുതരമായ ചട്ടലംഘനങ്ങളും ഭരണപരമായ വീഴ്ചകളും സംഭവിച്ചതായി സർക്കാരിനു വിവരം. അന്നത്തെ ഉന്നത ഉദ്യോഗസ്ഥർ ഉൾപ്പെടെയുള്ളവർക്കു നേരിട്ടുള്ള പങ്കുണ്ടെന്നും അവർക്കു വീഴ്ചകൾ സംഭവിച്ചിട്ടുണ്ടെന്നുമാണു പ്രാഥമികാന്വേഷണത്തിലെ സൂചന. ക്രൈംബ്രാഞ്ചിന്റെ പ്രത്യേക സംഘത്തെയും (എസ്ഐടി) വിജിലൻസിനെയും ഉപയോഗിച്ച് ഇതേക്കുറിച്ചു സമഗ്ര അന്വേഷണം നടത്താൻ സർക്കാർ ഉടൻ തീരുമാനിച്ചേക്കും.

ഹൈക്കോടതി ഉത്തരവും നിയമോപദേശവും മറച്ചുവച്ച് റവന്യു മന്ത്രിയെ ഇരുട്ടിൽ നിർത്തിയാണ് വിവാദ ഉത്തരവ് (261–2020–റവന്യു, 24–10–2020) ഇറക്കിയതെന്നും കേസിൽ പ്രതിയായ ആന്റോ അഗസ്റ്റിനും ഉന്നത ഉദ്യോഗസ്ഥനും നേരിട്ടു ബന്ധപ്പെട്ടിരുന്നു എന്നും രേഖകളി‍ൽ നിന്നു വ്യക്തമായിട്ടുണ്ട്. മരം കൊണ്ടുപോകാൻ അനുവദിക്കണമെന്നാവശ്യപ്പെട്ട് ആന്റോ അഗസ്റ്റിൻ എഴുതിയ കത്തും കണ്ടെത്തി.

 

പട്ടയഭൂമിയിലെ മരം മുറി അനുവദിക്കുന്നതു സംബന്ധിച്ച് ഇലക്ട്രോണിക് ഫയലായി നീങ്ങിയിരുന്ന ചർച്ചകൾ ഫിസിക്കൽ ഫയലാക്കി (പേപ്പർ ഫയൽ) മാറ്റിയതിനിടയിൽ ഒട്ടേറെ രേഖകളിൽ തിരിമറിയും കൂട്ടിച്ചേർക്കലുകളും നടന്നു. വനം വകുപ്പുമായുള്ള കൂടിയാലോചനയോ നിയമവകുപ്പിന്റെ പരിശോധനയോ ഇല്ലാതെ ഉത്തരവു പുറപ്പെടുവിച്ചതു സെക്രട്ടേറിയറ്റ് മാനുവലിന്റെ ലംഘനമാണെന്ന് വിദഗ്ധർ ചൂണ്ടിക്കാ ട്ടുന്നു.

 

വിവാദ ഉത്തരവിറങ്ങുന്നതിനു മുൻപു തന്നെ മരംമുറിക്ക് അനുമതി നൽകുന്ന സർക്കുലറിനെതിരെ ഹൈക്കോടതി ഇടക്കാല ഉത്തരവു പുറപ്പെടുവിച്ചിരുന്നു. അഡീഷനൽ അഡ്വക്കറ്റ് ജനറലിന്റെ നിയമോപദേശത്തിനായി ഫയൽ അയച്ചിരുന്നെങ്കിലും ഈ വിവരങ്ങളും കോടതിയുടെ ഇടക്കാല ഉത്തരവും മന്ത്രിയുടെ അംഗീകാരത്തിനായി സമർപ്പിച്ച ഫയലിൽ ഉൾപ്പെടുത്തിയില്ല.