ന്യൂഡൽഹി∙ പ്രധാനമന്ത്രിയുടെ ഓഫിസിലെ ഉന്നത ഉദ്യോഗസ്ഥയാണെന്നു പരിചയപ്പെടുത്തി ബംഗാൾ സെക്രട്ടേറിയറ്റിനുള്ളിൽ കയറി മന്ത്രിയെ കണ്ട യുവതി പിടിയിൽ. ബുധനാഴ്ചയാണ് വ്യാജ ഐഡന്റിറ്റി കാർഡ് ഉപയോഗിച്ച് അകങ്ഷ വിദ്യാർഥി (30) ബംഗാൾ പൊതുമരാമത്ത് മന്ത്രി ഡോ. അജയ് കുമാർ പോഡ്ഡറയുമായി കൂടിക്കാഴ്ച നടത്തിയത്.

 

സംഭാഷണം നടത്തവേ മന്ത്രിക്കുണ്ടായ സംശയമാണു യുവതിയെ കുറിച്ച് കൂടുതൽ അന്വേഷിക്കാൻ കാരണമായത്. യുവതിയുടെ വിവരങ്ങൾ മന്ത്രി ചോദിക്കാൻ ആരംഭിച്ചതോടെ അവർ പെട്ടെന്നു സ്ഥലം വിട്ടു. തുടർന്ന് മന്ത്രിയുടെ ഓഫിസിൽനിന്നു വിവരം പൊലീസിനു കൈമാറി. പിന്നാലെ നടന്ന അന്വേഷണത്തിൽ യുവതി ഡൽഹിയിലേക്കുള്ള വിമാനത്തിൽ യാത്ര ആരംഭിച്ചതായി മനസ്സിലാക്കി. ആൾമാറാട്ടം, വ്യാജ തിരിച്ചറിയൽ രേഖ നിർമിക്കൽ തുടങ്ങിയ കുറ്റങ്ങൾ ചുമത്തി ബംഗാൾ പൊലീസ് കേസ് റജിസ്റ്റർ ചെയ്തു.

 

വ്യാഴാഴ്ച ബംഗാളിൽനിന്ന് പൊലീസ് സംഘം ഡൽഹിയിലെത്തി യുവതിയെ വീട്ടിൽനിന്ന് അറസ്റ്റ് ചെയ്യുകയായിരുന്നു. ആൾമാറാട്ടം നടത്തിയത് എന്തിനാണെന്നത് ഉൾപ്പെടെയുള്ള കാര്യങ്ങൾക്കായി യുവതിയെ ഉടൻ ചോദ്യം ചെയ്യുമെന്ന് ഹൗറ സിറ്റി പൊലീസ് അറിയിച്ചു.