മൊറാദാബാദ് ( യുപി)∙ മോഷണക്കുറ്റം ആരോപിച്ച് 3 പേരെ ബിജെപി എംഎൽഎയുടെ വീട്ടിൽ തടങ്കലിലാക്കി അതിക്രൂരമായി പീഡിപ്പിച്ചെന്ന് പരാതി. ബർഹപുർ എംഎൽഎ സുശാന്ത് സിങ്ങിന്റെ വീട്ടിലാണ് അതിക്രമം നടന്നത്. തലകീഴായി കെട്ടിത്തൂക്കിയെന്നും വൈദ്യുതാഘാതമേൽപ്പിച്ചെന്നും ബെൽറ്റ് കൊണ്ട് അടിച്ചശേഷം മുറിവുകളിൽ ഉപ്പ് പുരട്ടിയെന്നുമാണ് ആരോപണം.

 

എംഎൽഎയുടെ മകന്റെ സ്വർണവള നഷ്ടപ്പെട്ടതിനെത്തുടർന്നാണ് വീട്ടുജോലിക്കാരായിരുന്ന അതുൽ, ലവേഷ്, സുഹൃത്ത് രാമു എന്നിവർക്കു നേരെ അതിക്രമമുണ്ടായത്. മൂന്നുപേരെയും ആശുപത്രിയിൽ പ്രവേശിപ്പിച്ചു. രാമുവിന്റെ നില ഗുരുതരമാണ്. പൊലീസ് കേസ് എടുത്തിട്ടില്ല. ഇരകൾക്ക് നീതി നൽകണമെന്നും ഉത്തരവാദികളായവർക്കെതിരെ കർശന നടപടി വേണമെന്നും ആവശ്യപ്പെട്ട് സമാജ്‌വാദി പാർട്ടി രംഗത്തെത്തി.