സ്വർണവില റെക്കോർഡ് തകർക്കാനുള്ള കുതിപ്പിലോ? കേരളത്തിൽ ഇന്നും സ്വർണ വിലയിൽ തീ പിടിച്ചു. ഗ്രാമിന് 295 രൂപ വർധിച്ച് 13,385 രൂപയായി. പവൻ വില 2360 രൂപ ഉയർ‌ന്ന് 1,07,080 രൂപയിലെത്തി. 4 ദിവസത്തിനിടെ പവന് വർധിച്ചത് 5600 രൂപ. യുഎസ് പ്രസിഡന്റ് ഡോണൾഡ് ട്രംപിന് ഇടക്കാല തിരഞ്ഞെടുപ്പിൽ കനത്ത തിരിച്ചടി കിട്ടിയതോടെ രാജ്യാന്തര സ്വർണവില വലിയ കുതിപ്പിലാണ്. ഇതാണ് കേരളത്തിലും പ്രതിഫലിച്ചത്.

 

അമേരിക്കയിൽ ഡെമോക്രാറ്റുകൾക്ക് മുൻതൂക്കം ലഭിച്ചതോടെ യുഎസ് ഡോളറിന്റെ വിനിമയ നിരക്ക് കുറഞ്ഞിട്ടുണ്ട്. യുഎസ് സർക്കാരിന്റെ കടപത്രങ്ങളിൽ നിന്ന് ലഭിക്കുന്ന ആദായനിരക്കും (യീൽഡ്) ഇടിഞ്ഞു. സ്വർണത്തിന്റെ ഡിമാൻഡ് ഉയർത്തുന്ന രണ്ട് നീക്കങ്ങളാണിത്. ഡോളർ ക്ഷീണത്തിലാകുന്നതോടെ മറ്റു കറൻസികളിൽ സ്വർണം വാങ്ങാനുള്ള ചെലവ് കുറയും. കടപത്രങ്ങളിൽ നിന്നുള്ള യീൽഡ് കുറയുന്നത് കൂടുതൽ‍ നിക്ഷേപകരെയും സ്വർണത്തിലേക്ക് ആകർഷിക്കും. ഇതോടെ രാജ്യാന്തര സ്വർണവില കുത്തനെ ഉയർന്നു. ഓഗസ്റ്റിനു ശേഷമുള്ള ഏറ്റവും വലിയ വിലക്കയറ്റമാണിത്. ഇന്നലെ ഔൺസിന് 4061 ഡോളറായിരുന്ന സ്വർണവില ഇന്ന് 4160 ഡോളർ വരെ ഉയർന്നു. നിലവിൽ ഔൺസിന് 4136 ഡോളറിലാണുള്ളത്.

 

ഇനിയെങ്ങോട്ട്?

നിലവിൽ 4200 ഡോളറിലാണ് സ്വർണത്തിന് പ്രതിരോധമുള്ളത്. ബോണ്ട് യീൽഡും ഡോളറും ഇടിഞ്ഞു നിൽക്കുകയും സ്വർണഡിമാൻഡ് ഉയരുകയും ചെയ്താൽ ഈ വില മറികടക്കാനും സ്വർണത്തിനു കഴിയും. ഇതോടെ അടുത്ത ലക്ഷ്യമായ 4400 ഡോളറിലേക്ക് വില കുതിക്കാം. യുഎസ് ഫെഡിന്റെ പലിശ നിരക്ക് സംബന്ധിച്ച നിലപാടുകളാകും ഇനി വിപണിയിൽ നിർണായകമാകുക. വെള്ളിയാഴ്ച പുറത്തു വരുന്ന തൊഴിൽക്കണക്ക് ഫെഡിന്റെ അടുത്ത തീരുമാനത്തെക്കുറിച്ചുള്ള സൂചനകൾ നൽകും. ഡിസംബറിൽ നടക്കുന്ന ഫെഡ് യോഗത്തിൽ പലിശ നിരക്ക് ഉയർത്താൻ 82% സാധ്യതയാണ് നിരീക്ഷകർ കാണുന്നത്. പലിശ നിരക്ക് ഉയർത്തിയാൽ‍ സ്വർണവില വീണ്ടും ഇടിയാനുള്ള സാഹചര്യമൊരുക്കും, മറിച്ചായാൽ വില കുതിക്കാനും.

 

അതേസമയം, അടുത്ത മൂന്നു മാസത്തിനുള്ളിൽ സ്വർണവില ഔൺസിന് 4500 ഡോളർ കടക്കുമെന്നാണ് സിറ്റി ബാങ്കിന്റെ പ്രവചനം. ഈ വർഷത്തിന്റെ അവസാനത്തോടെ ഹോർമുസ് കടലിടുക്ക് വീണ്ടും തുറക്കുമെന്നും സൗദി-ഹൂതി സംഘർഷത്തിനു പരിഹാരമാകുമെന്നും ബാങ്ക് കരുതുന്നു. ഇന്ത്യയിൽ ദീപാവലി വിപണിയിൽ ഡിമാൻഡ് നിലനിൽക്കുന്നതും ചൈനീസ് കേന്ദ്രബാങ്കുകളുടെ സ്വർണം വാങ്ങലും രാജ്യാന്തര വിലയിൽ നിർണായകമാകും.

 

കേരളത്തിൽ ഇന്ന് ഒരു പവൻ സ്വർണാഭരണം വാങ്ങാൻ 10% പണിക്കൂലിയും നികുതിയും ഹോൾമാർക്കിങ് ചാർജുകളും ചേർത്ത് 1,21,400 രൂപയെങ്കിലും വേണ്ടിവരും. ആഭരണങ്ങളുടെ ഡിസൈൻ അനുസരിച്ചു പണിക്കൂലിയിൽ വ്യത്യാസമുണ്ടാകും. കനം കുറഞ്ഞ ആഭരണങ്ങൾ നിർമിക്കാൻ ഉപയോഗിക്കുന്ന 18 കാരറ്റ് സ്വർണം ഗ്രാമിന് 235 രൂപ വർധിച്ച് 10,955 രൂപയിലെത്തി. 14 കാരറ്റ് സ്വർണം ഗ്രാമിന് 8570 രൂപയിലും 9 കാരറ്റ് സ്വർണം ഗ്രാമിന് 5525 രൂപയിലുമാണ് വിൽപന. വെള്ളി വിലയിലും മാറ്റമുണ്ട്. ഗ്രാമിന് 10 രൂപ വർധിച്ച് 210 രൂപയിലാണ് ഇന്നത്തെ വിൽപന. രാജ്യാന്തര വെള്ളി വില ഔൺസിന് 6.5 ശതമാനം വർധിച്ച് 52.98 ഡോളറിൽ എത്തിയതോടെയാണിത്.