തിരുവനന്തപുരം∙ കൊലപാതകം നടത്തുന്നതിന് ഒരാഴ്ച മുൻപ് തന്നെയും അഭിരാമിനെയും പ്രതി ക്രൂരമായി മർദിച്ചിരുന്നെന്ന് വധശ്രമത്തിൽ നിന്ന് രക്ഷപ്പെട്ട അഭിരാമിന്റെ സുഹ‍ൃത്ത് പൊലീസിൽ മൊഴി നൽകി. കേസിലെ ഒന്നാംപ്രതി തന്നെയും അഭിരാമിനെയും ഒരിടത്തേക്കു വിളിച്ചു വരുത്തി, പിന്നാലെ ക്രൂരമായി മർദിക്കുകയായിരുന്നെന്നാണ് പതിനേഴുകാരന്റെ മൊഴി.

 

അഭിരാമിന്റെ സുഹൃത്തായ പതിനേഴുകാരന്റെ ഫോണിൽ കേസിലെ ഒന്നാം പ്രതിയുടെ പെൺ സുഹൃത്തിന്റെ സ്വകാര്യ ചിത്രം ഉണ്ടായിരുന്നു എന്നാരോപിച്ചാണ് മർദിച്ചത്. ഇക്കാര്യം സംസാരിക്കാനായാണ് അഭിരാമിനേയും തന്നേയും പ്രതി വിളിച്ചുവരുത്തിയത്. മർദിച്ചതിനു പിന്നാലെ കൊല്ലുമെന്ന് ഭീഷണിപ്പെടുത്തുകയും ചെയ്തിരുന്നു. വീണ്ടും മർദിക്കുമെന്നും ഭീഷണിപ്പെടുത്തിയിരുന്നെന്നും അതുകൊണ്ടാണ് കൊലപാതക ദിവസം അഭിരാം വിളിച്ചപ്പോൾ പോകാതിരുന്നതെന്നും സുഹൃത്ത് പൊലീസിന് മൊഴി നൽകി.