ഒറ്റപ്പാലം ∙ പാലക്കാട് – കുളപ്പുള്ളി റോഡിൽ തൃക്കങ്ങോടിനു സമീപം നിയന്ത്രണം വിട്ട കാർ മരത്തിലിടിച്ച് 2 യുവാക്കൾ മരിച്ചു. 3 പേർക്കു ഗുരുതര പരുക്കേറ്റു. പനമണ്ണ കയറാട്ട് വൈശാഖ് (32), ഈസ്റ്റ് മനിശ്ശേരി പാന്തലിൽ പി.ആർ.അജയ് (31) എന്നിവരാണു തൽക്ഷണം മരിച്ചത്. ചുനങ്ങാട് പടിഞ്ഞാറേതിൽ ഗോവിന്ദ് (30), പനമണ്ണ സൗത്ത് കളത്തിൽപറമ്പിൽ ശ്രീജിത്ത് (31), കണ്ണിയംപുറം താഴത്തേതിൽ നിതിൻ (32) എന്നിവർക്കാണു പരുക്കേറ്റത്.

 

ഗോവിന്ദും നിതിനും വാണിയംകുളത്തെ സ്വകാര്യ ആശുപത്രിയിൽ ചികിത്സയിലാണ്. അതീവഗുരുതരമായി പരുക്കേറ്റ ശ്രീജിത്തിനെ വിദഗ്ധ ചികിത്സയ്ക്കായി തൃശൂർ മെഡിക്കൽ കോളജ് ആശുപത്രിയിലേക്കു മാറ്റി. വാണിയംകുളം ഭാഗത്തു നിന്ന് ഒറ്റപ്പാലം ഭാഗത്തേക്കു പോകുകയായിരുന്ന കാറാണ് അപകടത്തിൽപെട്ടത്. പാതയോരത്തെ കലുങ്കിന്റെ സംരക്ഷണഭിത്തിയിൽ ഇടിച്ച ശേഷമാണു കാർ മരത്തിലിടിച്ചത്. കഴിഞ്ഞ ദിവസം രാത്രി പന്ത്രണ്ടേമുക്കാലോടെയായിരുന്നു അപകടം. പൂർണമായി തകർന്ന കാർ വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. പൊലീസിന്റെയും ഷൊർണൂർ അഗ്നിരക്ഷാസേനയുടെയും നാട്ടുകാരുടെയും കൂട്ടായ്മയിലായിരുന്നു രക്ഷാപ്രവർത്തനം. അപകടകാരണം കാറിന്റെ അമിതവേഗമാണെന്നാണു പൊലീസിന്റെയും മോട്ടർ വാഹന വകുപ്പിന്റെയും പ്രാഥമിക നിഗമനം.

 

മരിച്ചവരുടെ മൃതദേഹങ്ങൾ പോസ്റ്റ്മോർട്ടത്തിനു ശേഷം ബന്ധുക്കൾക്കു കൈമാറി. ഇന്നു പാമ്പാടി ഐവർമഠം ശ്മശാനത്തിൽ സംസ്കരിക്കും. രാംദാസ് – ജ്യോതി ദമ്പതികളുടെ മകനാണു വൈശാഖ്. ഭാര്യ: സവിത. ദിവസങ്ങൾ മാത്രം പ്രായമുള്ള ആൺകുട്ടിയുണ്ട്. സഹോദരി: ആതിര. രവീന്ദ്രൻ – നിർമല ദമ്പതികളുടെ മകനാണ് അജയ്. ഭാര്യ: ശാലിനി. മകൾ: സാൻവി നിഹാര. സഹോദരങ്ങൾ: നിഖിൽ, അഖിൽ.