സമൂഹമാധ്യമങ്ങളിൽ വൈറലാകുന്നതിനായി ടിക് ടോക്ക് വീഡിയോ ചിത്രീകരിക്കുന്നതിനിടെ കടുവയുടെ ആക്രമണത്തിൽ പത്തൊൻപതുകാരൻ കൊല്ലപ്പെട്ടു. പാകിസ്ഥാനിലെ ലാഹോറിലുള്ള കഹ്ന പ്രദേശത്തെ ഒരു സ്വകാര്യ വന്യജീവി പ്രജനന ഫാമിലാണ് സംഭവം അരങ്ങേറിയത്. ഫാമിലെ ജീവനക്കാരനായ തൽഹയാണ് മരിച്ചത്. സംഭവവുമായി ബന്ധപ്പെട്ട് പ്രശസ്ത പാക് ടിക് ടോക്കർ നോമാൻ ഹസ്സൻ, ഫാം ഉടമ ഫയ്യാസ് എന്നിവരെ പൊലീസ് അറസ്റ്റ് ചെയ്തു.

 

വീഡിയോ ചിത്രീകരണത്തിനായി ഫാമിലെത്തിയ നോമാൻ ഹസ്സന്റെ ആവശ്യപ്രകാരം, കൂട്ടിലടച്ചിരുന്ന പെൺ കടുവയെ പുറത്തിറക്കാൻ ഫാം ഉടമ ഫയ്യാസ് ജീവനക്കാരനായ തൽഹയോട് നിർദ്ദേശിക്കുകയായിരുന്നു. എന്നാൽ, കൂട്ടിൽ നിന്നും പുറത്തുവന്ന കടുവ അപ്രതീക്ഷിതമായി തൽഹയെ ആക്രമിച്ചു. കടുവയെ പിന്നീട് നിയന്ത്രണവിധേയമാക്കിയ ശേഷം, ഗുരുതരമായി പരിക്കേറ്റ തൽഹയെ നോമാൻ ഹസ്സൻ സ്വന്തം കാറിൽ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

 

അതേ ഫാമിലെ ജീവനക്കാരായ തൽഹയുടെ പിതാവ് മുനീർ അഹമ്മദിന്റെയും സഹോദരന്റെയും കൺമുന്നിൽ വെച്ചായിരുന്നു അപകടം നടന്നത്. സംഭവം ആദ്യഘട്ടത്തിൽ നായയുടെ ആക്രമണമാണെന്ന് വരുത്തിത്തീർത്ത് കേസ് ഒതുക്കിത്തീർക്കാൻ ശ്രമം നടന്നതായും പൊലീസ് അന്വേഷണത്തിൽ വ്യക്തമായിട്ടുണ്ട്. തുടർന്ന് തൽഹയുടെ പിതാവ് നൽകിയ പരാതിയുടെ അടിസ്ഥാനത്തിൽ വന്യജീവി സംരക്ഷണ നിയമപ്രകാരം പൊലീസ് കേസെടുക്കുകയും പ്രതികളെ അറസ്റ്റ് ചെയ്യുകയുമായിരുന്നു. ആക്രമണം നടത്തിയ കടുവയെ വന്യജീവി വകുപ്പിന് കൈമാറിയതായും, സ്വകാര്യ ഫാമിന് കൃത്യമായ പ്രവർത്തന ലൈസൻസ് ഉണ്ടോയെന്ന കാര്യം പരിശോധിച്ചുവരികയാണെന്നും പൊലീസ് അധികൃതർ അറിയിച്ചു.