ഉത്തരാഖണ്ഡിൽ ഹരിദ്വാർ – ഡെറാഡൂൺ ദേശീയപാതയിൽ നേപ്പാളി ഫാമിന് സമീപം വ്യാഴാഴ്ച(നവംബർ12) പുലർച്ചെ നാലുമണിയോടെയായിരുന്നു നാടിനെ നടുക്കിയ സംഭവമുണ്ടായത്. റോഡിലൂടെ യാത്ര ചെയ്യുകയായിരുന്ന ബൈക്ക് യാത്രക്കാരൻ പെട്ടെന്ന് ഒരു കാട്ടാനയുടെ മുന്നിൽപ്പെടുകയായിരുന്നു. ആന ബൈക്ക് യാത്രക്കാരനെ റോഡിലേക്ക് തള്ളിയിട്ട ശേഷം നെഞ്ചിലും വയറിലും രണ്ട് തവണ ചവിട്ടുന്നതിന്റെ ഞെട്ടിക്കുന്ന ദൃശ്യങ്ങൾ പുറത്തുവന്നിട്ടുണ്ട്. ആനയുടെ കാലിനടിയിൽപ്പെട്ട ഇയാൾക്ക് ഗുരുതര പരിക്കേറ്റിട്ടുണ്ടാകുമെന്നാണ് ദൃക്സാക്ഷികൾ കരുതിയത്.

 

യാത്രക്കാർ ബഹളം വെച്ചും ഹോൺ മുഴക്കിയും ആനയെ ഓടിക്കാൻ ശ്രമിച്ചതിനെ തുടർന്ന്, ആന ഹൈവേയിലെ സുരക്ഷാവേലി കടന്ന് കാട്ടിലേക്ക് തന്നെ മടങ്ങി. ഇതിന് പിന്നാലെ മറ്റ് യാത്രക്കാർ അടുത്തെത്തുന്നതിന് മുൻപ് തന്നെ ആനയുടെ കാലിനടിയിൽപ്പെട്ട ബൈക്കർ അദ്ഭുതകരമായി എഴുന്നേറ്റു നിൽക്കുന്നതാണ് ദൃശ്യങ്ങളിലുള്ളത്. അതുവഴി കാറിൽ സഞ്ചരിക്കുകയായിരുന്ന ക്യാബ് ഡ്രൈവറും കണ്ടന്റ് ക്രിയേറ്ററുമായ ശിവ ശർമയാണ് ഈ ദൃശ്യങ്ങൾ പകർത്തി സമൂഹമാധ്യമങ്ങളിൽ പങ്കുവെച്ചത്. രാജാജി കടുവാ സങ്കേതത്തിന് സമീപമുള്ള ഈ പാതയിൽ ആനകളുടെ സാന്നിധ്യം പതിവായതിനാൽ, വന്യജീവികളുടെ ആവാസമേഖലയിലൂടെ രാത്രിയും പുലർച്ചെയും സഞ്ചരിക്കുന്നവർ കൂടുതൽ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്.