കൊച്ചി∙ വാഹനാപകടത്തിൽ ചേരാനല്ലൂർ സ്വദേശി ജയബാലകൃഷ്ണൻ മരിച്ച സംഭവത്തിൽ കാറോടിച്ച 17 കാരന്റെ മൊഴി വീണ്ടും രേഖപ്പെടുത്തി അന്വേഷണ സംഘം. പ്രായപൂർത്തിയാകാത്ത കുട്ടികൾ ഉൾപ്പെടുന്ന കേസുകളിൽ നിയമപ്രകാരമുള്ള നടപടിക്രമങ്ങൾ പാലിക്കണമെന്ന കോടതി നിർദേശത്തെ തുടർന്നാണ് ഈ നടപടി. താൻ ആദ്യമായിട്ടല്ല വാഹനം ഓടിക്കുന്നതെന്നും ഇതിനു മുൻപും കാറും ബൈക്കും ഓടിച്ചിട്ടുണ്ടെന്നും 17 കാരൻ അന്വേഷണ സംഘത്തിനു മൊഴി നൽകിയതായാണു വിവരം. ഈ വാഹനം ഉപയോഗിച്ചു താൻ മുൻപും സ്കൂളിൽ പോയിട്ടുണ്ടെന്നും കുട്ടി സമ്മതിച്ചു. പക്ഷേ, പിതാവ് അറിയാതെയാണ് വാഹനങ്ങൾ ഓടിച്ചിരുന്നതെന്നാണ് കുട്ടി വ്യക്തമാക്കിയത്.

 

ജുവനൈൽ ജസ്റ്റിസ് നിയമപ്രകാരം സോഷ്യൽ ബാക്ക്ഗ്രൗണ്ട് റിപ്പോർട്ട് തയാറാക്കുന്നതിന്റെ ഭാഗമായാണ് കുട്ടിയുടെ മാതാപിതാക്കളുടെയോ മറ്റുള്ളവരുടെയോ സാന്നിധ്യമില്ലാതെ, കോടതി അനുമതിയോടെ ഈ മൊഴിയെടുക്കൽ പൂർത്തിയാക്കിയത്. ഈ റിപ്പോർട്ട് ഉടൻ തന്നെ അന്വഷണം സംഘം കോടതിയിൽ സമർപ്പിക്കും. ജുവനൈൽ ജസ്റ്റിസ് ബോർഡും സെഷൻസ് കോടതിയും ജാമ്യം അനുവദിച്ചിരുന്നുവെങ്കിലും 17 കാരന്റെ ജാമ്യം റദ്ദാക്കണമെന്ന് ആവശ്യപ്പെട്ട് ജയബാലകൃഷ്ണന്റെ കുടുംബം നൽകിയ അപ്പീൽ ഹൈക്കോടതി പരിഗണനയിലാണ്. ഹർജിയിൽ നോട്ടിസ് അയച്ച കോടതി അടുത്തയാഴ്ച വീണ്ടും പരിഗണിക്കും.

 

കഴിഞ്ഞ ഒക്ടോബർ 25 ന് പുലർച്ചെ രണ്ടരയോടെ ചേരാനല്ലൂർ കണ്ടെയ്‌നർ റോഡിൽവച്ചായിരുന്നു കേസിനാസ്പദമായ അപകടം. ശക്തമായ മഴയത്ത് അമിതവേഗത്തിൽ (108 കിലോമീറ്ററിലധികം വേഗതയിൽ) ബെൻസ് കാർ ഓടിച്ച 17 കാരൻ ജയബാലകൃഷ്ണൻ സഞ്ചരിച്ച സ്കൂട്ടറിനു പിന്നിൽ ഇടിക്കുകയായിരുന്നു. അപകടത്തിൽ ഗുരുതരമായി പരുക്കേറ്റ ജയബാലകൃഷ്ണൻ അന്നു തന്നെ മരിച്ചു. കുട്ടിയുടെ മൊബൈൽ ഫോണിൽനിന്ന് ലഭിച്ച ദൃശ്യങ്ങൾ അന്വേഷണ സംഘം വീണ്ടെടുത്തിരുന്നു. സ്പീഡോമീറ്ററിൽ 108 കി.മീ വേഗത കാണിക്കുന്ന ദൃശ്യം ഒരു കൈകൊണ്ട് സ്റ്റിയറിങ് പിടിച്ച് മറ്റേ കൈകൊണ്ട് ഫോണിൽ പകർത്തിയതായിരുന്നു. കൂടാതെ, ഇവർ താമസിച്ചിരുന്ന ഫ്ലാറ്റിലെ സെക്യൂരിറ്റി ജീവനക്കാരന്റെ മൊഴിയും സിസിടിവി ദൃശ്യങ്ങളും ഇൻസ്റ്റാഗ്രാം റീലുകളും അടക്കം നിരവധിയായ തെളിവുകൾ പൊലീസ് മുൻപേ ശേഖരിച്ചിട്ടുണ്ട്. കാറിന്റെ ഉടമയായ അഡീഷനൽ ജില്ലാ ജഡ്ജിയെയും കേസിൽ പ്രതിചേർത്തിരുന്നു. തന്റെ അറിവോടു കൂടിയല്ല മകൻ വാഹനം ഓടിച്ചത് എന്നാണ് പിതാവ് നൽകിയിട്ടുള്ള മൊഴി. 17 കാരന്റെ പിതാവിനെ അറസ്റ്റ് ചെയ്യണമെന്ന ആവശ്യം അന്വഷണവുമായി സഹകരിക്കുന്ന കാര്യം ചൂണ്ടിക്കാട്ടി ഹൈക്കോടതി നേരത്തെ നിരസിച്ചിരുന്നു.