ചെന്നൈ ∙ മധുരയിലെ തനിഷ്ക് ജ്വല്ലറിയിൽ നിന്നു 20 കിലോ സ്വർണം കവർന്ന സംഭവത്തിൽ രണ്ടുപേർ അറസ്റ്റിൽ. സോഷ്യൽ മീഡിയ ഇൻഫ്ലുവന്‍സർ മീനാക്ഷി, പ്രതിയെന്നു സംശയിക്കുന്ന നിഷാന്തിന്റെ പിതാവ് സുരേഷ് എന്നിവരാണ് പിടിയിലായത്. മധുര സ്വദേശി നിഷാന്തിനായി പൊലീസ് അന്വേഷണം ഊർജിതമാക്കി. പിടിയിലായവരിൽനിന്ന് 5 കിലോ സ്വർണം കണ്ടെടുത്തതായാണ് സൂചന.

 

9 പൊലീസ് സംഘങ്ങളാണ് കേസ് അന്വേഷിക്കുന്നത്. പിൻഭാഗത്തെ ഭിത്തിയും വാതിലും തകർത്താണ് മുഖംമൂടി ധരിച്ചെത്തിയ മോഷ്ടാക്കൾ അകത്തുകടന്നത്. നിർമാണ പ്രവർത്തനങ്ങൾക്കായി കെട്ടിടത്തിനു പിന്നിൽ സൂക്ഷിച്ച പണിയായുധങ്ങളാണ് മോഷ്ടാക്കൾ ഉപയോഗിച്ചത്. പ്രദർശനത്തിനു വച്ചിരുന്ന സ്വർണമാണ് മോഷ്ടാക്കൾ ലക്ഷ്യമിട്ടതെന്നു പൊലീസ് പറഞ്ഞു. ദീപാവലിയോട് അനുബന്ധിച്ചാണ് ഷോറൂം ഉദ്ഘാടനം ചെയ്തത്.