രാജസ്ഥാനിലെ ശ്രീഗംഗാനഗർ ജില്ലയിലുണ്ടായ ഐഇഡി സ്ഫോടന പരമ്പരയിൽ നിർണായക വഴിത്തിരിവ്. നവംബർ മൂന്നിന് അനുപ്ഗഢ്-സൂറത്ഗഢ് റെയിൽവേ പാതയിൽ നടന്ന സ്ഫോടനവുമായി ബന്ധപ്പെട്ട് പഞ്ചാബിലെ ഗുർദാസ്പൂർ സ്വദേശികളായ മഹക്ദീപ് കൗർ (21), ദവീന്ദർ സിങ് (22) എന്നിവരെ രാജസ്ഥാൻ തീവ്രവാദ വിരുദ്ധ സേനയും (എടിഎസ്) ഗംഗാനഗർ പോലീസും ചേർന്ന് അറസ്റ്റ് ചെയ്തു.

 

അറസ്റ്റിലായ മഹക്ദീപ് കൗറിന് പാക് ഏജന്റുമാരുമായി ബന്ധമുണ്ടായിരുന്നുവെന്ന് പോലീസ് വ്യക്തമാക്കുന്നു. ‘ചാച്ച’, ‘ഷാ’ എന്നീ പേരുകളിൽ അറിയപ്പെടുന്ന പാകിസ്ഥാൻ കേന്ദ്രീകരിച്ച് പ്രവർത്തിക്കുന്ന ഹാൻഡ്ലർമാരുമായാണ് ഇവർ ആശയവിനിമയം നടത്തിയിരുന്നത്. കടുത്ത സാമ്പത്തിക പ്രതിസന്ധിയിലായിരുന്ന യുവതിയെ പണം നൽകിയാണ് പാക് ഏജന്റുകൾ സ്വാധീനിച്ചത്. വിവാഹമോചിതയായ മഹക്ദീപ് മുൻപ് ലഹരിക്കടത്ത് കേസിലും പ്രതിയായിരുന്നതായി പോലീസ് പറഞ്ഞു.

 

പ്രതികൾ സ്ഫോടന സംഘത്തിന് വേണ്ട ഒളിത്താവളങ്ങളും യാത്രാസൗകര്യങ്ങളും ഒരുക്കിക്കൊടുത്തു. കൃത്യം നടത്തേണ്ട റെയിൽവേ ട്രാക്ക് കൃത്യമായി ചൂണ്ടിക്കാണിച്ചു നൽകിയതും ഇവരാണെന്നാണ് അന്വേഷണ സംഘത്തിന്റെ വിലയിരുത്തൽ. സംഭവത്തിന് പിന്നിൽ വലിയൊരു ഗൂഢാലോചനയുണ്ടെന്നും രാജ്യസുരക്ഷയെ ലക്ഷ്യമിട്ടുള്ള അട്ടിമറിയാണോ ഇതെന്നും പോലീസ് വിശദമായി അന്വേഷിച്ചു വരുന്നുണ്ട്.

 

നവംബർ മൂന്നിന് നടന്ന സ്ഫോടനത്തിൽ റെയിൽവേ ട്രാക്കിന് ഗുരുതരമായ കേടുപാടുകൾ സംഭവിച്ചിരുന്നു. കോൺക്രീറ്റ് സ്ലീപ്പറുകൾ തകർന്ന് ട്രാക്കിന് താഴെ രണ്ടര അടിയോളം ആഴമുള്ള വലിയ കുഴിയാണ് രൂപപ്പെട്ടത്. എന്നാൽ സ്ഫോടനം നടക്കുന്നതിന് കേവലം അരമണിക്കൂർ മുൻപ് ഈ പാതയിലൂടെ അനുപ്ഗഢ്-സൂറത്ഗഢ് പാസഞ്ചർ ട്രെയിൻ കടന്നുപോയിരുന്നു എന്നത് വലിയൊരു ദുരന്തത്തിന്റെ വ്യാപ്തിയാണ് ഒഴിവാക്കിയത്. ട്രെയിൻ കടന്നുപോയ ഉടൻ തന്നെ സ്ഫോടനം നടന്നത് വലിയൊരു അട്ടിമറി ലക്ഷ്യമിട്ടാണെന്നതിന്റെ വ്യക്തമായ സൂചനയാണ് നൽകുന്നത്.