ന്യൂഡൽഹി∙ ഡൽഹിയിൽ വസ്ത്രശാലയിലെ ജീവനക്കാരിയായ പതിനെട്ടുകാരി ട്രയൽ റൂമിൽ കൊല്ലപ്പെട്ട നിലയിൽ. വെസ്റ്റ് ഡൽഹി സ്വദേശിയായ ഷബ്നം ആണ് മോട്ടി നഗർ മെട്രോ സ്റ്റേഷനു സമീപമുള്ള തുണിക്കടയിൽവച്ച് കൊല്ലപ്പെട്ടത്. ശനിയാഴ്ചയാണ് സംഭവം. ഷബ്നത്തിന്റെ സുഹൃത്തായിരുന്ന ആളാണ് പ്രതിയെന്നാണ് പൊലീസിന്റെ പ്രാഥമിക നിഗമനം.

 

ശനിയാഴ്ച ഷബ്നത്തിന്റെ ജോലിസമയം അവസാനിക്കാനായപ്പോൾ പ്രതിയായ യുവാവ് കടയിലെത്തിയെന്നും തുടർന്ന് പ്രതി ഷബ്നത്തെ ട്രയൽ റൂമിലേക്ക് കൂട്ടിക്കൊണ്ടുപോയി മൂർച്ചയേറിയ ആയുധം ഉപയോഗിച്ച് കഴുത്തുമുറിച്ച് കൊലപ്പെടുത്തുകയായിരുന്നുവെന്നും പൊലീസ് പറഞ്ഞു. തുടർന്ന് ഇയാൾ സ്ഥലത്തുനിന്ന് രക്ഷപ്പെട്ടു. രാത്രി ഒമ്പതു മണിയോടെ കട അടയ്ക്കാൻ മറ്റ് ജീവനക്കാർ തയ്യാറെടുക്കുമ്പോഴാണ് ഷബ്നത്തെ രക്തത്തിൽ കുളിച്ച് മരിച്ചനിലയിൽ കണ്ടെത്തിയത്.

 

ഷബ്നവും യുവാവും നേരത്തെ അടുത്ത ബന്ധത്തിലായിരുന്നു. എന്നാൽ ഏതാനും മാസങ്ങൾക്കു മുൻപ് ബന്ധം വഷളായതോടെ ഇരുവരും പിരിഞ്ഞു. ഇതേത്തുടർന്നുള്ള വൈരാഗ്യമാണ് കൊലപാതകത്തിൽ കലാശിച്ചതെന്നാണ് വിവരം.