പാലക്കാട് ∙ സാമ്പാറും കൂട്ടി ചോറ് കഴിക്കാമെന്നു കരുതിയാൽ കീശ കാലിയാകും. അരിക്കും പച്ചക്കറിക്കും തീ വില. ഒരു കിലോഗ്രാം ചിക്കനു വില 145 രൂപ, ഒരു കിലോഗ്രാം മുരിങ്ങക്കായയ്ക്കു വില 180 രൂപ. സാമ്പാറുണ്ടാക്കാൻ ചിക്കൻ കറിയെക്കാൾ ചെലവേറും. ഒരാഴ്ചയ്ക്കിടെ പല പച്ചക്കറികൾക്കും കൂടിയതു 5 മുതൽ 70 രൂപ വരെ. അരിക്കു 10 രൂപ വരെ കൂടി.

 

ഒരാഴ്ച മുൻപ് കിലോഗ്രാമിനു 80 രൂപയുണ്ടായിരുന്ന മുരിങ്ങക്കായയുടെ ഇന്നലത്തെ വില 180 രൂപ. കിലോഗ്രാമിനു 160 രൂപയുണ്ടായിരുന്ന വെളുത്തുള്ളിയുടെ വില 220 മുതൽ 240 രൂപ വരെയെത്തി. ബീൻസ്, പാവയ്ക്ക, സവാള, പച്ചമുളക്, തക്കാളി എന്നിവയുടെ വിലയും 7 മുതൽ 20 രൂപ വരെ കൂടി. ചെറിയുള്ളി കിലോഗ്രാമിനു 170 രൂപ. ഒരാഴ്ച മുൻപുണ്ടായിരുന്നത് 120 രൂപ. സവാള കിലോഗ്രാമിനു 65 മുതൽ 77 രൂപ വരെയാണു ചില്ലറവില.

 

തമിഴ്നാട്, കർണാടക എന്നിവിടങ്ങളിൽ നിന്നാണു കേരളത്തിലേക്കു കൂടുതലും പച്ചക്കറി എത്തുന്നത്. ഈ സംസ്ഥാനങ്ങളിലുണ്ടായ മഴയും വെള്ളക്കെട്ടും കാരണം കൃഷിനാശം സംഭവിച്ചതും വിളവെടുപ്പിലെ കുറവുമാണു പച്ചക്കറിവരവ് കുറയാൻ കാരണമെന്നു വ്യാപാരികൾ പറയുന്നു. കേരളത്തിലെ കാലാവസ്ഥ വ്യതിയാനം ഇവിടത്തെ പച്ചക്കറി ഉൽപാദനത്തെയും ബാധിച്ചതായി കർഷകർ പറഞ്ഞു. ഇതു ഹോട്ടൽ മേഖലയിലും തിരിച്ചടിയായി.

 

ഭക്ഷണവിഭവങ്ങൾക്കു വേണ്ടിയുള്ള പച്ചക്കറികളിൽ വില കൂടിയവ ഒഴിവാക്കേണ്ട അവസ്ഥയിലാണെന്നു ഹോട്ടൽ ഉടമകൾ പറയുന്നു. വാണിജ്യ സിലിണ്ടറുകളുടെ വിലവർധനയുണ്ടാക്കിയ പ്രതിസന്ധിക്കിടെ പച്ചക്കറികളുടെ വില ഉയർന്നതും ഹോട്ടൽ വ്യവസായത്തെ ബാധിച്ചതായി ഉടമകൾ പറയുന്നു. വിപണിയിൽ സർക്കാർ ഇടപെട്ട് വിലക്കയറ്റം നിയന്ത്രിക്കണമെന്നാണ് ആവശ്യം.

 

‘പൊന്നുപോലെ’ അരി

പൊന്നി അരിക്ക് രണ്ടാഴ്ചയ്ക്കിടെ കൂടിയത് 10 രൂപ. കിലോഗ്രാമിന് 48 രൂപയുണ്ടായിരുന്ന പൊന്നി അരിക്ക് ഇന്നലെ വില 58 രൂപ. കിലോഗ്രാമിന് 48 രൂപയുണ്ടായിരുന്ന മട്ട അരിക്ക് ഇന്നലെ വില 54 രൂപ. ജ്യോതി അരിക്കു 6 രൂപ കൂടി 57 രൂപയും ജയ അരിക്കു 5 രൂപ കൂടി 55 രൂപയുമായി. കുറുവ അരിക്കു 3 രൂപ കൂടി. തമിഴ്നാട്, ആന്ധ്ര എന്നിവിടങ്ങളിൽ നിന്നാണു കേരളത്തിലേക്കു കൂടുതലായും അരി എത്തുന്നത്. അവിടത്തെ കൃഷിനാശവും എഥനോൾ ഉൽപാദനത്തിനായി ധാന്യങ്ങൾ ഉപയോഗിക്കുന്നതും അരിക്ഷാമത്തിനു കാരണമായതായി വ്യാപാരികൾ പറയുന്നു.

 

പച്ചക്കറി വില (ബ്രാക്കറ്റിൽ ഒരാഴ്ച മുൻപുള്ള വില)

 

∙ തക്കാളി: 42–50 രൂപ (30–35 രൂപ)

 

∙ ഉരുളക്കിഴങ്ങ്: 60–80 രൂപ (40–50)

 

∙ ബീറ്റ്റൂട്ട്: 43–51 രൂപ (35–40)

 

∙ കാരറ്റ്: 80 (40–50)

 

∙ വള്ളിപ്പയർ: 70 (60)

 

∙ വെണ്ടയ്ക്ക: 50 (42)

 

∙ പാവയ്ക്ക: 78 (65)

 

∙ കാബേജ്: 40 (32)

 

∙ വഴുതന: 55 (45)

 

∙ വെള്ളരി: 45 (38)

 

∙ മത്തങ്ങ: 30 (20)

 

∙ കുമ്പളം: 38 (32)

 

∙ പച്ചമുളക്: 75 (60)