പെരുമ്പിലാവ് ∙ ഓടിക്കൊണ്ടിരുന്ന കെയുആർടിസി എസി ലോഫ്ലോർ ബസ് ഒരു വശത്തേക്കു ചെരിഞ്ഞു യാത്ര ചെയ്യുന്നതു കണ്ടു നാട്ടുകാർ ഡ്രൈവറെ ചോദ്യം ചെയ്തു. തൃശൂരിൽ നിന്നു കോഴിക്കോട്ടേക്കു പോകുകയായിരുന്ന ബസ് ആണ് ഇടതുവശം ചരിഞ്ഞ് അപകടകരമായ രീതിയിൽ സർവീസ് നടത്തിയത്. വ്യാഴാഴ്ച രാവിലെ 8ന് പെരുമ്പിലാവ് സെന്ററിലാണു സംഭവം. ബസിന്റെ ലീഫ് പൊട്ടിയതാണ് ബസ് അപകടകരമായ രീതിയിൽ ചരിയാൻ കാരണമായതെന്നു കരുതുന്നു.

 

യാത്രക്കാരെ കയറ്റാനായി പെരുമ്പിലാവ് സ്റ്റോപ്പിൽ നിർത്തിയപ്പോൾ പൊതുപ്രവർത്തകനായ എം.എ.കമറുദ്ദീൻ ബസിന്റെ തകരാറും ഒരുവശം ചരിഞ്ഞു ഓടുന്നതും ഡ്രൈവറുടെ ശ്രദ്ധയിൽപെടുത്തി. വലിയ അപകടം ഉണ്ടാകാൻ സാധ്യതയുണ്ടെന്നു ചൂണ്ടിക്കാണിച്ചെങ്കിലും ഡ്രൈവർ കൂസലില്ലാതെ ബസ് മുന്നോട്ടെടുത്തു പോകുകയായിരുന്നുവെന്നു നാട്ടുകാർ പറഞ്ഞു. നിറയെ യാത്രക്കാരുമായാണു ബസ് സർവീസ് നടത്തിയിരുന്നത്. ബസിന്റെ നമ്പറും ചരിഞ്ഞ് ഓടുന്ന വിഡിയോയും ഉൾപ്പെടെയുള്ള വിവരങ്ങൾ ചേർത്തു ഗതാഗത മന്ത്രിക്കു പരാതി അയച്ചതായി കമറുദ്ദീൻ പറഞ്ഞു.