ബെംഗളൂരു∙ ശുചിമുറി ഉപയോഗിക്കാൻ വീട്ടിലേക്ക് അതിക്രമിച്ചു കയറിയ ഡെലിവറി ബോയ് നഗ്നതാപ്രദർശനം നടത്തിയതായി യുവതിയുടെ ആരോപണം. പാഴ്സൽ നൽകാനായാണ് ഡെലിവറി ബോയ് വീട്ടിലെത്തിയതെന്നു സമൂഹമാധ്യമത്തിലെ പോസ്റ്റിൽ യുവതി പറഞ്ഞു. ശുചിമുറി ഉപയോഗിക്കാൻ അനുവാദം ചോദിച്ചു. താൻ വിസമ്മതിച്ചപ്പോൾ അയാൾ ബലമായി അകത്തേക്ക് പ്രവേശിച്ചു.

 

അപരിചിതരെ ഫ്ലാറ്റിനുള്ളിൽ കയറ്റില്ലെന്നു പലതവണ പറഞ്ഞു. അത്യാവശ്യമാണെങ്കിൽ തൊട്ടടുത്തുള്ള പുരുഷൻമാരായ അയൽക്കാരോട് ചോദിക്കാനും നിർദേശിച്ചു. എന്നാൽ അയാൾ ചെരിപ്പ് ഊരിവച്ച് അനുവാദമില്ലാതെ ബലമായി വീട്ടിലേക്ക് അതിക്രമിച്ചു കയറിയെന്നു യുവതി പോസ്റ്റിൽ കുറിച്ചു.

 

ശുചിമുറിയിൽ നിന്നു പുറത്തിറങ്ങിയ ശേഷം ഡെലിവറി ബോയ് തന്റെ നേരെ നഗ്നതാപ്രദർശനം നടത്തിയതായും യുവതി ആരോപിച്ചു. സുരക്ഷയെക്കുറിച്ച് വലിയ ഭയമുണ്ടായെന്നും യുവതി പോസ്റ്റിൽ എഴുതിയിട്ടുണ്ട്. സമൂഹമാധ്യമത്തിലെ പോസ്റ്റ് ശ്രദ്ധയിൽപ്പെട്ട ബെംഗളൂരു പൊലീസ്, നിയമനടപടി സ്വീകരിക്കുന്നതിനായി കൂടുതൽ വിവരങ്ങൾ പങ്കുവയ്ക്കാൻ യുവതിയോട് ആവശ്യപ്പെട്ടു. തുടർനടപടികളിലേക്ക് കടക്കുന്നതിന് മുന്നോടിയായി കൂടുതൽ വിവരങ്ങൾക്കായി കാത്തിരിക്കുകയാണെന്ന് ഉദ്യോഗസ്ഥർ പറഞ്ഞു.