കൊല്ലം∙ പിണങ്ങിപ്പോയ ഭാര്യയെ തിരക്കി പൊലീസ് സ്റ്റേഷനിലെത്തിയ ആളിൽനിന്ന് എംഡിഎംഎ പിടികൂടി. ആറ്റിങ്ങൽ സ്വദേശി സനിൽ കുമാറാണ് പിടിയിലായത്. ഭാര്യയുടെ സഹോദരിയുടെ മരണ വിവരമറിഞ്ഞ് കൊല്ലം ചാത്തന്നൂരിലെത്തിയതായിരുന്നു ഇവർ. മരണവീട്ടിൽവച്ച് സനിൽ കുമാറും ഭാര്യയും തമ്മിൽ തർക്കമുണ്ടായി. ഇതിനിടെ, ഭാര്യയ്ക്ക് പരുക്കേൽക്കുകയും ചെയ്തു.

 

ഇതോടെ ആശുപത്രിയിൽ കാണിക്കാൻ ഭാര്യ പുറത്തിറങ്ങിയതോടെ സനിൽ കുമാറും പിന്നാലെയിറങ്ങി. സനിൽ പിന്തുടരുന്നുവെന്ന് മനസ്സിലായതോടെ ഭാര്യ ചാത്തന്നൂർ പൊലീസ് സ്റ്റേഷനിലേക്ക് കയറുകയായിരുന്നു. ഇതിനു പിന്നാലെ ഇയാളും പൊലീസ് സ്റ്റേഷനിലേക്ക് കയറി. ഭർത്താവ് മർദിച്ച വിവരം സനിൽ കുമാറിന്റെ ഭാര്യ പൊലീസുകാരെ അറിയിച്ചു. സനിലിന്റെ പെരുമാറ്റത്തിൽ സംശയം തോന്നിയ പൊലീസുകാർ ദേഹപരിശോധന നടത്തിയപ്പോഴാണ് ഒരു ഗ്രാം എംഡിഎംഎ കണ്ടെത്തിയത്. സനിൽ കുമാറിനെതിരെ കേസ് റജിസ്റ്റർ ചെയ്ത് അറസ്റ്റ് രേഖപ്പെടുത്തി.