ന്യൂഡൽഹി ∙ ജാമിയ സർവകലാശാലയിൽ പ്രതിഷേധത്തിൽ പങ്കെടുത്ത മലയാളി വിദ്യാർഥിയെ സസ്പെൻഡ് ചെയ്തു. പിഎച്ച്ഡി വിദ്യാർഥിയായ നെവിൽ തോമസിനെയാണു സർവകലാശാല അധികൃതർ 5 ദിവസത്തേക്കു സസ്പെൻഡ് ചെയ്തത്. ഹോസ്റ്റലിൽ താമസിച്ചിരുന്ന പെൺകുട്ടികളെ ഉൾപ്പെടെ നിർബന്ധപൂർവം ഒഴിപ്പിക്കുന്നതിനെതിരെ കഴിഞ്ഞ ദിവസമാണു വിദ്യാർഥികൾ പ്രതിഷേധിച്ചത്. നെവിലിനെ സസ്പെൻഡ് ചെയ്തതിനു പിന്നാലെ സമരത്തിൽ പങ്കെടുത്ത മറ്റ് 2 വിദ്യാർഥികൾക്കു കാരണം കാണിക്കൽ നോട്ടിസും നൽകി.

 

കഴിഞ്ഞ ദിവസം പരീക്ഷയെഴുതാൻ പോയ ആബിദ എന്ന ബിരുദ വിദ്യാർഥി തിരിച്ചെത്തിയപ്പോൾ ഹോസ്റ്റൽമുറി പൂട്ടിയിട്ടിരിക്കുന്നതാണു കണ്ടത്. ആബിദയുടെ പുസ്തകങ്ങളും വസ്ത്രങ്ങളും ഗാർബേജ് ബാഗിലാക്കി മുറിക്കു പുറത്തു കൂട്ടിയിട്ടിരുന്നു. അതുൾപ്പെടെ ചോദ്യംചെയ്തവർക്കെതിരെ എടുത്ത നടപടി റദ്ദാക്കണമെന്ന് ഐസ ആവശ്യപ്പെട്ടു. വിദ്യാർഥികൾ അവകാശങ്ങൾക്കായി ശബ്ദമുയർത്തുന്നതിനെ അച്ചടക്കലംഘനമായി സർവകലാശാല അധികൃതർ കാണരുതെന്നും ഐസ പ്രസ്താവനയിലൂടെ ആവശ്യപ്പെട്ടു. എന്നാൽ, ക്യാംപസിൽ പ്രതിഷേധിക്കാൻ വിദ്യാർഥികൾക്കു പ്രത്യേക സ്ഥലം അനുവദിച്ചിട്ടുണ്ടെന്നും അതു ലംഘിച്ചതിനാണു സസ്പെൻഷൻ ഉൾപ്പെടെയുള്ള നടപടികളെന്നുമാണു സർവകലാശാലയുടെ വിശദീകരണം.