ചെന്നൈ∙ ഗ്രാനൈറ്റ് വ്യവസായി ആർ.വീരമണിക്കെതിരെ വീണ്ടും പോക്സോ കേസ് റജിസ്റ്റർ ചെയ്തു. ഇതോടെ കേസുകളുടെ എണ്ണം മൂന്നായി. പീഡനത്തിനിരയായ പ്ലസ്‌ടു വിദ്യാർഥിനി ആത്മഹത്യ ചെയ്തതിൽ പുനരന്വേഷണം ആവശ്യപ്പെട്ട് മാതാവ് ഐസ്ഹൗസ് പൊലീസിൽ പരാതി നൽകിയതോടെയാണു കേസെടുത്തത്.

പഠന സഹായം വാഗ്ദാനം ചെയ്ത് വീരമണി വീട്ടിലേക്കു വിളിപ്പിച്ച പെൺകുട്ടി 2004ലാണ് ആത്മഹത്യ ചെയ്തത്. ദീപാവലി സമ്മാനം തരാമെന്നു പറഞ്ഞാണ് പെൺകുട്ടിയെ വിളിപ്പിച്ചതെന്നും പരാതിയിൽ പറയുന്നു. കുട്ടിയുടെ മരണത്തിനു ശേഷം വീരമണി ആശുപത്രിയിലെത്തി 30,000 രൂപ നൽകിയെന്നും സംസ്കാര ക്രമീകരണങ്ങൾ ചെയ്തെന്നും മാതാവ് പൊലീസിനോട് പറഞ്ഞു. ജല്ലിക്കെട്ട് പ്രക്ഷോഭത്തെ തുടർന്ന് ഐസ്ഹൗസ് സ്റ്റേഷനു പ്രക്ഷോഭകാരികൾ തീയിട്ടതോടെ കേസിന്റെ രേഖകൾ 2017ൽ നശിച്ചെന്ന് അന്വേഷണ സംഘം കണ്ടെത്തി. വീരമണി പിടിയിലായതിനെ തുടർന്നാണ് പരാതിയുമായി മാതാവ് വീണ്ടുമെത്തിയത്.

 

∙ അന്വേഷണം പ്രത്യേക സംഘത്തിന് തന്നെ

 

ദിവസങ്ങൾക്കു മുൻപ് മാത്രം രൂപീകരിച്ച പ്രത്യേക അന്വേഷണ സംഘത്തിന് സമയം നൽകണമെന്ന് പറഞ്ഞ മദ്രാസ് ഹൈക്കോടതി, വീരമണിക്ക് എതിരായ കേസിലെ അന്വേഷണം സിബിഐക്ക് കൈമാറാൻ വിസമ്മതിച്ചു. തെളിവുകളെല്ലാം ഒറ്റയടിക്ക് ശേഖരിക്കാൻ പൊലീസിന്റെ കൈവശം മാന്ത്രികവടിയോ ഭാവി കാണാനുള്ള ദിവ്യദൃഷ്ടിയോ ഇല്ലെന്ന് ജസ്റ്റിസ് വി.ലക്ഷ്മിനാരായണൻ പറഞ്ഞു. ഉന്നത ഉദ്യോഗസ്ഥർക്കു പങ്കുള്ളതിനാൽ കേസ് പ്രത്യേക അന്വേഷണ സംഘത്തിൽ നിന്നു മാറ്റ ണമെന്ന് ആവശ്യപ്പെട്ടു മാധ്യമപ്രവർത്തക വരാകിയാണ് കോടതിയെ സമീപിച്ചത്. കേസുമായി ബന്ധപ്പെട്ടു തെളിവുകളുണ്ടെന്നും കോടതിയെ അറിയിച്ചു. കയ്യിലുള്ള തെളിവുകൾ പ്രത്യേക അന്വേഷണ സംഘത്തിനു മുന്നിൽ ഇന്നു ഹാജരാക്കണമെന്നു കോടതി നിർദേശം നൽകി.