കോട്ടയം ∙ സ്വകാര്യ ആശുപത്രികളിലെ ചികിത്സാച്ചെലവ് നിയന്ത്രിക്കുന്നതിനും ചികിത്സപ്പിഴവ് സംബന്ധിച്ച പരാതികൾ പരിശോധിക്കുന്നതിനും ആരോഗ്യ വകുപ്പ് ഉന്നതതല സമിതിയെ നിയോഗിച്ചു. ആരോഗ്യ വകുപ്പ് പ്രിൻസിപ്പൽ സെക്രട്ടറി അധ്യക്ഷനായ സമിതിയിൽ ആരോഗ്യ വകുപ്പ് ഡയറക്ടറും മെഡിക്കൽ സർവീസ് കോർപറേഷൻ മാനേജിങ് ഡയറക്ടറും അംഗങ്ങളാണ്. സ്വകാര്യ ആശുപത്രികളിലെ ഉയർന്ന ചികിത്സച്ചെലവും ചികിത്സപ്പിഴവും സംബന്ധിച്ച് പരാതികൾ ഉയർന്ന സാഹചര്യത്തിലാണ് ഉന്നത സമിതിയെ നിയോഗിക്കാൻ മന്ത്രി കെ.മുരളീധരൻ നിർദേശം നൽകിയത്. സമിതി റിപ്പോർട്ടിന്റെ അടിസ്ഥാനത്തിൽ തുടർ നടപടികൾ എടുക്കുമെന്ന് ആരോഗ്യ വകുപ്പ് അധികൃതർ അറിയിച്ചു.

 

സ്വകാര്യ ആശുപത്രികളിലെ ചികിത്സ സാധാരണക്കാർക്കു താങ്ങാവുന്ന തലത്തിലാക്കുക, മരുന്നുവിലയിലെ കൊള്ള അവസാനിപ്പിക്കുക തുടങ്ങിയവയ്ക്കാണ് സമിതിയുടെ അന്വേഷണത്തിൽ ഊന്നൽ. സമിതി പരിശോധിക്കുന്ന വിഷയങ്ങൾ ഇവയാണ്: ആശുപത്രി ഫാർമസികളിൽ നിന്ന് മരുന്നുകൾ എംആർപി വിലയിൽത്തന്നെ ലഭ്യമാക്കണം. ഇതിനായി മരുന്നു വില സുതാര്യമാക്കും. ആശുപത്രികളിൽ നടത്തുന്ന വിവിധ പരിശോധനകൾ സമിതി പരിശോധിക്കും. കൂടാതെ വിവിധ ശസ്ത്രക്രിയകളുടെ ചെലവും പരിശോധിക്കും. മുറിവാടക നിരക്കുകൾ‌ പുനഃപരിശോധിക്കും. ജനറൽ വാർഡിനും സാധാരണ മുറികൾക്കും മാത്രമാണ് പരിശോധന ബാധകം.

 

ചെലവു കുറയ്ക്കുന്നതിന് സർക്കാർ ഇൻഷുറൻസ് പദ്ധതികൾ സ്വകാര്യ ആശുപത്രികളിലേക്ക് വ്യാപിപ്പിക്കുന്നതിന്റെ സാധ്യത പരിശോധിക്കും. സ്വകാര്യ ആശുപത്രികൾക്ക് മരുന്നുകൾ സർക്കാർ സ്ഥാപനമായ മെഡിക്കൽ സർവീസ് കോർപറേഷൻ വാങ്ങി നൽകുന്നതിനും ആലോചന. ചികിത്സയിലെ പിഴവുകൾ, പോരായ്മകൾ എന്നിവ സമിതി പരിശോധിക്കും. ഇതോടൊപ്പം പിഴവുകൾ ഭാവിയിൽ ഒഴിവാക്കുന്നതിന് നടപടികൾ എടുക്കുകയും ബന്ധപ്പെട്ടവരെ ഉത്തരവാദികളാക്കുകയും ചെയ്യുന്ന തരത്തിൽ നടപടികൾ എടുക്കാനാണ് സമിതിക്ക് നൽകിയ നിർദേശം. ക്ലിനിക്കൽ എസ്റ്റാബ്ലിഷ്മെന്റ് ആക്ടിലെ സർക്കാരിന്റെ അധികാരങ്ങൾ ഉപയോഗിച്ചാണ് നടപടി.