കൽപറ്റ ∙ മുട്ടിൽ സൗത്ത് വില്ലേജിനു പുറമേ വയനാട്ടിലെ തൃക്കൈപ്പറ്റ വില്ലേജിൽ നടന്ന അനധികൃത മരംമുറിക്ക് അനുമതി നൽകുന്നതിലും അന്നത്തെ റവന്യു പ്രിൻസിപ്പൽ സെക്രട്ടറി എ. ജയതിലക് ഇടപെട്ടതിന്റെ തെളിവു പുറത്ത്. തൃക്കൈപ്പറ്റ നത്തംകുനിയിലെ കാപ്പിത്തോട്ടത്തിൽ 500 വർഷം പഴക്കമുള്ള ഈട്ടിമരം മുറിക്കാനുള്ള അപേക്ഷയിൽ തുടർനടപടി സ്വീകരിക്കാൻ 2020 ഡിസംബർ 12നു റവന്യു പ്രിൻസിപ്പൽ സെക്രട്ടറി വയനാട് കലക്ടർക്കു നിർദേശം നൽകി.

 

2020 ഒക്ടോബർ 10ന് ആണു മരം മുറിക്കാൻ അനുമതി തേടിയുള്ള അപേക്ഷ റവന്യു പ്രി‍ൻസിപ്പൽ സെക്രട്ടറിക്കു ലഭിക്കുന്നത്. 14 ദിവസങ്ങൾക്കു ശേഷം, സംസ്ഥാനവ്യാപകമായി വൻതോതിൽ ഈട്ടിമരം‌മുറിയിലേക്കു നയിച്ച വിവാദ ഉത്തരവും ഇറങ്ങി. അധികം വൈകാതെയാണു തൃക്കൈപ്പറ്റ വില്ലേജിലെ ഈട്ടിമരം മുറിക്കാനുള്ള അപേക്ഷ പരിഗണിച്ച് ആവശ്യമായ തുടർനടപടികൾ സ്വീകരിക്കാനും വിവരം അപേക്ഷകയെ അറിയിക്കാനും നിർദേശിച്ചു ജയതിലക് കലക്ടർക്കു കത്ത് അയക്കുന്നത്. തുടർന്ന് ഭൂവുടമ ഈട്ടി മുറിക്കുകയും ചെയ്തു.

 

എന്നാൽ, ചന്ദനം ഒഴികെയുള്ള എല്ലാ റിസർവ് മരങ്ങളും വെട്ടിവീഴ്ത്താൻ അനുമതി നൽകി 2020 മാർച്ചിൽ റവന്യുവകുപ്പ് ഇറക്കിയ സർക്കുലർ ജൂലൈയിൽ ഹൈക്കോടതി അസാധുവാക്കിയിരുന്നു. ഈ ഉത്തരവിനെ മറികടന്ന് ജയതിലക് മരംമുറി അപേക്ഷ പരിഗണിക്കുകയും ഒക്ടോബറിൽ വിവാദ ഉത്തരവ് ഇറക്കുകയും ചെയ്തുവെന്നതാണു ദുരൂഹത വർധിപ്പിക്കുന്നത്. വിവാദ ഉത്തരവ് റദ്ദാക്കിയതിനെത്തുടർന്ന്, 2021 ജനുവരിയിൽ തൃക്കൈപ്പറ്റയിലെ ഭൂവുടമയ്ക്കെതിരെ കേസ് എടുക്കുകയും തടികൾ കസ്റ്റഡിയിലെടുക്കുകയും ചെയ്തിരുന്നു.

 

ഭൂവുടമയിൽനിന്ന് 37.27 ലക്ഷം രൂപ പിഴ ഈടാക്കണമെന്നു നിർദേശമുണ്ടായെങ്കിലും റവന്യു റിക്കവറി ഉൾപ്പെടെ തുടർനടപടികൾ ഇഴഞ്ഞുനീങ്ങുകയാണ്. തൃക്കൈപ്പറ്റ വില്ലേജിൽ ഈട്ടി മുറിക്കുന്നതായി വൈത്തിരി തഹസിൽദാർക്കു നേരത്തെ വിവരം ലഭിച്ചിട്ടും തടഞ്ഞില്ല. അതിനു പിന്നാലെയാണു മുട്ടിൽ സൗത്ത് വില്ലേജിൽനിന്നു കോടിക്കണക്കിനു രൂപയുടെ ഈട്ടിമരങ്ങൾ അഗസ്റ്റിൻ സഹോദരന്മാർ വെട്ടിക്കടത്തിയത്.