തിരുവനന്തപുരം∙ സ്‌പോൺസർമാരിൽനിന്നുൾപ്പെടെ പണം സമാഹരിച്ച് കെഎസ്ആർടിസി പുതിയതായി വാങ്ങിയ പല ബസുകളും സ്‌കൂൾ ബസുകളായി ചില കമ്പനികൾ പുറത്തിറക്കുന്നതാണെന്ന് ആക്ഷേപം. ഇവ ദീർഘദൂര യാത്രയ്ക്കു യോജിച്ചതല്ലെന്നാണ് യാത്രക്കാർ പറയുന്നത്. ഈ ബസുകളുമായി ദീർഘദൂര റൂട്ടിൽ സ്വകാര്യ ബസുകളുമായി മത്സരിക്കാൻ കഴിയില്ലെന്ന് ഈ രംഗത്തെ വിദഗ്ധരും ചൂണ്ടിക്കാട്ടുന്നു.

 

എയർ സസ്‌പെൻഷനുള്ള, എസിയുള്ള ബസുകൾ യാത്രക്കാർ തിരഞ്ഞെടുക്കുമ്പോൾ കോഴിക്കൂട് പോലെയുള്ള ബസുകൾ കെഎസ്ആർടിസി മാത്രം പുറത്തിറക്കുന്നത് എന്തിനാണെന്നാണ് യാത്രക്കാർ ചോദിക്കുന്നത്. സ്‌പോൺസർഷിപ്പ് വഴി 70 ബസുകൾ ലഭിക്കുമെന്നാണ് മന്ത്രി സി.പി.ജോൺ നിയമസഭയിൽ പറഞ്ഞത്. ഇത് വലിയ നേട്ടമാണെങ്കിലും കോർപറേഷന് സാമ്പത്തിക ബാധ്യത ഇല്ലാതെ വാങ്ങിയ ഈ ബസുകളിൽ എങ്കിലും മെച്ചപ്പെട്ട സീറ്റുകൾ ഉറപ്പാക്കാൻ കഴിയില്ലെങ്കിൽ എങ്ങനെ കെഎസ്ആർടിസിയെ ആശ്രയിക്കുമെന്ന സംശയമാണ് യാത്രക്കാർക്കുള്ളത്.

 

∙ സീറ്റുകൾ കുത്തനെ, കൊടുംചൂടിൽ യാത്ര

 

സ്‌പോൺസർഷിപ്പ് വഴിയുള്ള ബസുകൾ കെഎസ്ആർടിസിക്കു ലഭിച്ചു തുടങ്ങി. ആദ്യ ബസ് പാപ്പനംകോട് സെൻട്രൽ വർക്‌ഷോപ്പിൽ എത്തി. എൽഡിഎഫ് സർക്കാരിന്റെ അവസാനകാലത്ത് വാങ്ങിയ സൂപ്പർ ഫാസ്റ്റ്, ഫാസറ്റ് പാസഞ്ചർ ബസുകളിലെ സൗകര്യക്കുറവ് സംബന്ധിച്ചു വ്യാപക പരാതി ഉയർന്നിട്ടും പുതിയ ബസുകളിൽ ആ പ്രശ്‌നം പരിഹരിക്കാൻ കെഎസ്ആർടിസിക്കായിട്ടില്ല. സീറ്റുകൾ സംബന്ധിച്ച പരാതികൾ പുതിയ ബസുകൾ വാങ്ങുമ്പോൾ പരിഹരിക്കുമെന്നായിരുന്നു ഗതാഗത മന്ത്രിയുടെ പ്രഖ്യാപനം.