കല്ലമ്പലം ∙ ഉച്ചാരണം ശരിയായില്ലെന്ന് ആരോപിച്ചു വിദ്യാർഥിയെ ക്ലാസിൽ പരസ്യമായി അപമാനിക്കുകയും ഈർക്കിൽ കൊണ്ടു നാക്ക് വടിപ്പിക്കുകയും ചെയ്ത അധ്യാപകനെ മാനേജ്മെന്റ് സസ്പെൻഡ് ചെയ്തു. തേവലക്കാട് എസ്എൻ യുപി സ്കൂൾ സോഷ്യൽ സയൻസ് അധ്യാപകൻ എസ്.ആകർഷിനെതിരെയാണു നടപടി. 2 മാസം മുൻപായിരുന്നു സംഭവം.

 

ഉച്ചാരണത്തിൽ പിഴവു സംഭവിച്ച കുട്ടിക്ക് അധ്യാപകൻ ഇത്തരത്തിൽ ശിക്ഷ വിധിച്ചതിനെതിരെ വിദ്യാർഥികൾ പരാതിയെഴുതി ഹെഡ്മിസ്ട്രസിനു നൽകി. തുടർന്നു പരാതി ചൈൽഡ് വെൽഫെയർ കമ്മിറ്റിക്കു കൈമാറുകയും അന്വേഷണം തുടങ്ങുകയും ചെയ്തു. ഇതിനിടയിൽ അധ്യാപകനെ മാനേജ്മെന്റ് സസ്പെൻഡ് ചെയ്യുകയായിരുന്നു.

 

പഠനത്തിന്റെ ഭാഗമായാണു നടപടിയെന്നാണ് അധ്യാപകന്റെ വിശദീകരണമെങ്കിലും അത്തരം പഠന ഭാഗങ്ങൾ സിലബസിൽ ഇല്ലെന്നു കണ്ടെത്തിയെന്നും മാനേജർ തോട്ടക്കാട് ശശി അറിയിച്ചു.