സ്വർണം പണയം വെച്ചുള്ള വായ്പകൾ കൈമാറുന്നതും മറ്റൊരു ബാങ്കിലേക്ക് മാറ്റുന്നതും സാധാരണ സാമ്പത്തിക ഇടപാടുകളാണ്. എന്നാൽ ഈ വിശ്വാസത്തെ മറയാക്കി ലക്ഷങ്ങൾ തട്ടിയെടുക്കാൻ ശ്രമിച്ചെന്ന കേസിൽ യുവതി അറസ്റ്റിലായിരിക്കുകയാണ്. ബാങ്കുകളെയും സ്വകാര്യ ധനകാര്യ സ്ഥാപനങ്ങളെയും തെറ്റിദ്ധരിപ്പിച്ച് സ്വർണപ്പണയ വായ്പ മറ്റൊരു സ്ഥാപനത്തിലേക്ക് മാറ്റാനെന്ന വ്യാജേന ഏകദേശം 50 ലക്ഷം രൂപ തട്ടിയെടുത്തെന്ന കേസിലാണ് തിരുവനന്തപുരം ചെമ്പൂർ ഒറ്റശേഖരമംഗലം സ്വദേശിനിയായ നിഷ (37)യെ ആര്യങ്കോട് പോലീസ് പിടികൂടിയത്. സെപ്റ്റംബർ 14-ന് ചെമ്പൂരിലെ ഒരു പ്രമുഖ ബാങ്ക് മാനേജരെ സമീപിച്ച പ്രതി, 50 ലക്ഷം രൂപയുടെ സ്വർണവായ്പ ടേക്ക് ഓവർ ചെയ്യണമെന്ന ആവശ്യമാണ് ഉന്നയിച്ചത്. തുടർന്ന് ബാങ്ക് വായ്പ അനുവദിച്ച് തുക നിഷയുടെ ഇസാഫ് ബാങ്ക് സേവിങ്സ് അക്കൗണ്ടിലേക്ക് കൈമാറി. പണം അക്കൗണ്ടിലെത്തിയതിനു പിന്നാലെ യുവതി മുങ്ങിയെന്നാണ് പോലീസ് പറയുന്നത്. ലഭിച്ച തുക വിവിധ ബാങ്ക് അക്കൗണ്ടുകളിലേക്ക് മാറ്റുകയും ചെയ്തതായി അന്വേഷണത്തിൽ കണ്ടെത്തിയിട്ടുണ്ട്. പിന്നീട് പണയസ്വർണം സംബന്ധിച്ച ഇടപാട് പൂർത്തിയാക്കാൻ ശ്രമിച്ചപ്പോഴാണ് തട്ടിപ്പിന്റെ വിവരങ്ങൾ പുറത്തുവന്നത്.

 

പണം കൈമാറിയ അക്കൗണ്ടുകളെ കേന്ദ്രീകരിച്ച് നടത്തിയ അന്വേഷണമാണ് കേസിൽ നിർണായകമായത്. ബാങ്ക് ഇടപാടുകളുടെ വിവരങ്ങൾ പിന്തുടർന്ന് പാലക്കാട്, മലപ്പുറം ജില്ലകളിൽ നടത്തിയ പരിശോധനയിൽ കരിങ്കല്ലത്താണി കേന്ദ്രീകരിച്ച് പ്രവർത്തിക്കുന്ന സ്വകാര്യ പണമിടപാട് സ്ഥാപനത്തെയും സമാനരീതിയിൽ കബളിപ്പിച്ചതായി പോലീസിന് വിവരം ലഭിച്ചു. കേരളത്തിലെ മറ്റു പ്രമുഖ പണമിടപാട് സ്ഥാപനങ്ങളെയും ഇതേ രീതിയിൽ സമീപിച്ചിട്ടുണ്ടെന്നാണ് അന്വേഷണസംഘത്തിന്റെ കണ്ടെത്തൽ. നിഷ ചാർട്ടേഡ് അക്കൗണ്ടന്റിന്റെ ഓഫീസിൽ ജോലി ചെയ്തിരുന്നുവെന്നും റിപ്പോർട്ടുകളിലുണ്ട്.

 

ആര്യങ്കോട് സ്റ്റേഷൻ ഹൗസ് ഓഫീസർ സാബുവിന്റെ നേതൃത്വത്തിൽ ജിഎഎസ്ഐമാരായ പ്രവീൺ കുമാർ, ഷീബ, സിപിഒമാരായ ജയപ്രകാശ്, അക്ഷയ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ തുടർനടപടികൾക്കായി കൈമാറി. തട്ടിപ്പിന് പിന്നിൽ മറ്റാരുടെയെങ്കിലും നിർദേശമോ സഹായമോ ഗൂഢാലോചനയോ ഉണ്ടായിരുന്നോ എന്ന കാര്യവും പോലീസ് അന്വേഷിച്ചുവരികയാണ്. വിവിധ ബാങ്കുകളിലേക്കും ധനകാര്യ സ്ഥാപനങ്ങളിലേക്കും വ്യാപിച്ചിട്ടുണ്ടെന്ന് സംശയിക്കുന്ന ഇടപാടുകളുടെ മുഴുവൻ വിവരങ്ങളും പുറത്തുവരാനിരിക്കുന്നതേയുള്ളൂ.