വാഹന കമ്പത്തിന്റെ കാര്യത്തിൽ ഒട്ടും പിന്നിലല്ല നടൻ മോഹൻലാൽ. ഇപ്പോഴിതാ ജാപ്പനീസ് ആഡംബര വാഹന നിർമാതാക്കളായ ലെക്സസിന്റെ മുൻ നിര മോഡൽ സ്വന്തമാക്കിയിരിക്കുകയാണ് മോഹൻലാൽ. തന്റെ പുതിയ ലെക്സസ് എൽഎം 350എച്ച് എംപിവിയിൽ യാത്ര ചെയ്യുന്ന താരത്തിന്റെ വിഡിയോയാണ് സോഷ്യൽ മീഡിയയിൽ ഇപ്പോൾ തരംഗമായി മാറി കൊണ്ടിരിക്കുന്നത്.

 

നിർമാതാവ് ആന്റണി പെരുമ്പാവൂരാണ് വാഹനം ഓടിക്കുന്നത്. യാത്രയ്ക്കിടെ ‘ആന്റണി വണ്ടി എങ്ങനെയുണ്ട് ?’ എന്ന് മോഹൻലാൽ ചോദിക്കുന്നതും, ‘സൂപ്പർ’ എന്ന് ആന്റണി മറുപടി നൽകുന്നതും വിഡിയോയിൽ കാണാം. തുടർന്ന് വാഹനം ഒന്ന് ഓടിച്ചു നോക്കാൻ ആന്റണി മോഹൻലാലിനെ ക്ഷണിക്കുന്നുണ്ടെങ്കിലും, തനിക്ക് അല്പം ഉറക്കം വരുന്നുണ്ടെന്നും മറ്റൊരിക്കലാകാമെന്നുമാണ് മോഹൻലാലിന്റെ മറുപടി.

 

നിർമാതാവ് ബിനു ജോർജ് അലക്സാണ്ടർ ആണ് ഈ വിഡിയോ പങ്കുവച്ചത്. പുതിയ വണ്ടി, പഴയ ഓര്‍മകള്‍ എന്ന അടിക്കുറിപ്പോടെയാണ് ബിനു വിഡിയോ പങ്കുവച്ചിരിക്കുന്നത്. ലാലേട്ടൻ്റെ ഓഫ്സ്ക്രീൻ ഡ്രൈവിങ് കാണണമെന്നുണ്ട് എന്നാണ് നിരവധി ആരാധകർ വിഡിയോയ്ക്ക് കമന്റായി കുറിച്ചിരിക്കുന്നത്.

 

ഏട്ടൻ്റെ പാട്ട് ഏട്ടൻ്റെ വണ്ടിയിൽ കേൾക്കുമ്പോൾ ഒരു വല്ലാത്ത സന്തോഷം എന്നും ചിലർ കുറിച്ചിട്ടുണ്ട്. അതേസമയം, തരുൺ മൂർത്തി സംവിധാനം ചെയ്യുന്ന അതിമനോഹരം ആണ് മോഹൻലാലിന്റേതായി ഇനി റിലീസ് ചെയ്യാനുള്ള ചിത്രം. മീര ജാസ്മിൻ ആണ് ചിത്രത്തിലെ നായിക. ഡിസംബർ 24 നാണ് ചിത്രം റിലീസ് ചെയ്യുന്നത്.