കടമ്പനാട്: കൊല്ലം കടമ്പനാട് യുവതിയുടെ ആത്മഹത്യയുമായി ബന്ധപ്പെട്ട കേസ് അട്ടിമറിക്കാൻ ഏനാത്ത് പൊലീസ് നടത്തിയ ഗുരുതരമായ വീഴ്ചകൾ പുറത്ത്. യുവതിയുടെ ശരീരത്തിൽ മർദ്ദനമേറ്റ പാടുകളുണ്ടെന്ന് മുൻ സി.ഐയും അന്നത്തെ എസ്.ഐയും തമ്മിൽ സംസാരിക്കുന്ന സിസിടിവി ദൃശ്യങ്ങളാണ് പുറത്തുവന്നിരിക്കുന്നത്. ഭർത്താവിന്റെ പങ്ക് മറച്ചുവെച്ച് യൂത്ത് കോൺഗ്രസ് സംസ്ഥാന ജനറൽ സെക്രട്ടറി സുഹൈൽ അൻസാരിയെ പ്രതിയാക്കാൻ പൊലീസ് ബോധപൂർവം ശ്രമിച്ചെന്നാണ് പ്രധാന കണ്ടെത്തൽ.

 

ഫെബ്രുവരി 14-ന് രാത്രി 10 മണിയോടെയാണ് പൊലീസ് ഉദ്യോഗസ്ഥർ തമ്മിലുള്ള ഈ സംഭാഷണം നടന്നത്. യുവതിക്ക് ഭർത്താവിൽ നിന്നും മർദ്ദനമേറ്റിട്ടുണ്ടെന്ന് വ്യക്തമായിട്ടും, ഇൻക്വസ്റ്റ് റിപ്പോർട്ടിലോ ഭർത്താവിന്റെ മൊഴിയിലോ പൊലീസ് ഈ വിവരങ്ങൾ ഉൾപ്പെടുത്തിയില്ല. മകളുടെ മരണകാരണം ഭർത്താവിന്റെ മർദ്ദനമാണെന്ന് കാണിച്ച് യുവതിയുടെ പിതാവ് നൽകിയ പരാതിയും പൊലീസ് പൂഴ്ത്തിവെച്ചു. യുവതിയും സുഹൈൽ അൻസാരിയും ഒരേ സ്കൂളിലെ ജീവനക്കാരായിരുന്നു എന്ന സൗഹൃദം മുൻനിർത്തി, ഭർത്താവ് അനിൽ കുമാർ ഉന്നയിച്ച ആരോപണങ്ങൾ മാത്രം അടിസ്ഥാനമാക്കി സുഹൈൽ അൻസാരിയെ പ്രതിയാക്കുകയായിരുന്നു. തുടർന്നുള്ള നിയമപോരാട്ടങ്ങൾക്കൊടുവിലാണ് കേസ് ക്രൈംബ്രാഞ്ച് ഏറ്റെടുത്തത്.

 

ക്രൈംബ്രാഞ്ച് നടത്തിയ അന്വേഷണത്തിലാണ് യുവതിക്ക് മരണത്തിന് തൊട്ടുമുമ്പ് ഭർത്താവ് അനിൽകുമാറിൽ നിന്ന് ക്രൂരമായ മർദ്ദനമേറ്റിരുന്നുവെന്നും, ആ സമയത്ത് സുഹൈൽ അൻസാരി സ്ഥലത്തുണ്ടായിരുന്നില്ലെന്നും വ്യക്തമായത്. ഇതിനെത്തുടർന്ന് അനിൽകുമാറിനെ ക്രൈംബ്രാഞ്ച് അറസ്റ്റ് ചെയ്യുകയും ഇയാൾ റിമാൻഡിലാവുകയും ചെയ്തു. കേസ് അട്ടിമറിക്കാൻ ശ്രമിച്ച പൊലീസ് ഉദ്യോഗസ്ഥർക്കെതിരെ അന്വേഷണം ആരംഭിച്ചിട്ടുണ്ട്.