മധ്യപ്രദേശിലെ ദിൻഡോറി ജില്ലയിൽ അയൽവാസിയുടെ ക്രൂരകൃത്യത്തിൽ യുവാവിന് ദാരുണാന്ത്യം. രസഗുളയാണെന്നു തെറ്റിധരിപ്പിച്ച് നൽകിയ മൃഗവേട്ടയ്ക്കുള്ള ബോംബ് കടിച്ചാണ് പഡാരിയ ഗ്രാമവാസിയായ രാജേന്ദ്ര ബറോട്ടിയ കൊല്ലപ്പെട്ടത്. ചൊവ്വാഴ്ച (നവംബർ 10) വൈകിട്ടാണ് ഈ സംഭവം ഉണ്ടായത്.

 

വീട്ടിലിരിക്കുകയായിരുന്ന രാജേന്ദ്രയുടെ അരികിലേക്ക് അയൽവാസിയായ രാം ഭഗത് ബറോട്ടിയ എത്തുകയും, ഇരുവരും സംസാരിച്ചിരിക്കുന്നതിനിടയിൽ രസഗുളയാണെന്ന് പറഞ്ഞ് ഒരു വസ്തു നൽകുകയുമായിരുന്നു. വെളിച്ചക്കുറവ് കാരണം അത് ബോംബ് ആണെന്ന് തിരിച്ചറിയാൻ രാജേന്ദ്രയ്ക്ക് സാധിച്ചില്ല. വായിൽ വച്ച് കടിച്ചയുടൻ തന്നെ ബോംബ് പൊട്ടിത്തെറിക്കുകയായിരുന്നു. സ്ഫോടനത്തിൽ ഗുരുതരമായി പരിക്കേറ്റ രാജേന്ദ്രയെ ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

 

മൃഗങ്ങളെ വേട്ടയാടാൻ ഉപയോഗിക്കുന്ന സ്ഫോടകവസ്തുവാണ് നൽകിയതെന്ന് രാജേന്ദ്രയുടെ ഭാര്യ സുശീല ബായി മാധ്യമങ്ങളോട് വ്യക്തമാക്കി. സംഭവത്തിൽ പ്രതിയായ രാം ഭഗത് ബറോട്ടിയയെയും മറ്റൊരാളെയും കോട്‌വാലി പൊലീസ് സ്റ്റേഷൻ ഇൻ ചാർജ് പ്രസാദ് നാഗ്പുരെയുടെ നേതൃത്വത്തിൽ അറസ്റ്റ് ചെയ്തു. തനിക്ക് ഈ വസ്തു ഒരു ആൺകുട്ടിയാണ് നൽകിയതെന്നാണ് രാം ഭഗത് പൊലീസിന് നൽകിയിട്ടുള്ള മൊഴി. നിലവിൽ ആൺകുട്ടിയെയും പൊലീസ് കസ്റ്റഡിയിലെടുത്ത് വിശദമായി ചോദ്യം ചെയ്തു വരികയാണ്.