തിരുവനന്തപുരം∙ കന്യാകുമാരി ജില്ലയിലെ മാർത്താണ്ഡത്തിന് സമീപം 86 വയസ്സുകാരനെ അയൽവാസി പാമോയിൽ ഒഴിച്ച് തീകൊളുത്തി കൊലപ്പെടുത്തി. മാർത്താണ്ഡത്തിനടുത്തുള്ള തിക്കുറിച്ചി സ്വദേശിയായ കുഴന്തൈ വേലുവാണ് മരിച്ചത്. തുണികൾ ശരീരത്തിൽ ഇട്ടശേഷം പാമോയിൽ ഒഴിച്ചു തീകൊളുത്തുകയായിരുന്നു. അയൽവാസിയായ ആൽബെർട്ട് ആസ്പിനെ പൊലീസ് പിടികൂടി.

 

കുഴന്തൈ വേലുവിന്റെ മകൻ ജപമണിയോടുള്ള വൈരാഗ്യമാണ് കൊലപാതകത്തിലേക്ക് നയിച്ചതെന്ന് പ്രാഥമിക റിപ്പോർട്ട്. അയൽവാസികൾ തമ്മിൽ അതിർത്തിത്തർക്കം നിലനിന്നിരുന്നു. ഇതേച്ചൊല്ലി ആൽബെർട്ടും കുഴന്തൈ വേലുവിന്റെ മകനും തമ്മിൽ വഴക്കടിക്കുകയും പൊലീസിൽ പരാതി നൽകുകയും ചെയ്തു. ഇതേത്തുടർന്നാണ് ആൽബെർട്ട് ഇന്നലെ രാത്രി ഇവരുടെ വീട്ടിലെത്തി ആക്രമണം നടത്തിയത്.

 

ആൽബെർട്ട് ബഹളം വച്ചപ്പോൾ ജപമണി പൊലീസിനെ അറിയിക്കാൻ മാർത്താണ്ഡം സ്‌റ്റേഷനിലേക്കു പോയി. ഈ സമയത്താണ് രോഗാവസ്ഥയിലുള്ള കുഴന്തൈ വേലുവിന്റെ ശരീരത്തിൽ തുണികൾ വാരിയിട്ടശേഷം പാമോയിൽ ഒഴിച്ച് തീകൊളുത്തിയത്. ജപമണി തിരിച്ചെത്തിയപ്പോൾ വീട്ടിൽനിന്നു പുകയുയരുന്നതു കണ്ട് നോക്കിയപ്പോഴാണ് പിതാവിനെ മരിച്ച നിലയിൽ കണ്ടത്. കുഴന്തൈവേലുവിന്റെ ശരീരം പൂർണമായി കത്തിയമർന്നു.