തിരുവനന്തപുരം: കൊലപാതകം നടന്ന് രണ്ടാഴ്ച പിന്നിട്ടിട്ടും നിർണായക തെളിവുകൾ കണ്ടെത്താനാകാതെ അന്വേഷണസംഘം. പാങ്ങപ്പാറ അഭിരാം കൊലപാതകക്കേസിൽ പിടിയിലായ പ്രായപൂർത്തിയാകാത്ത പ്രതികൾ ഉൾപ്പെടെയുള്ളവരുടെ പരസ്പരവിരുദ്ധമായ മൊഴികളാണ് പോലീസിനെ പ്രതിസന്ധിയിലാക്കുന്നത്. കൃത്യത്തിന് ഉപയോഗിച്ച ആയുധം, അഭിരാം സംഭവസമയത്ത് ധരിച്ചിരുന്ന വസ്ത്രങ്ങൾ, കൊലപാതകത്തിന് ഉപയോഗിച്ച ബെൽറ്റ്, അഭിരാമിന്റെയും സുഹൃത്ത് ആനന്ദിന്റെയും മൊബൈൽ ഫോണുകൾ എന്നിവ ഇതുവരെ കണ്ടെത്താനായിട്ടില്ല. തെളിവുകൾ നശിപ്പിക്കാൻ പ്രതികൾ ആസൂത്രിതമായി നീക്കങ്ങൾ നടത്തിയിട്ടുണ്ടാകാമെന്നാണ് പോലീസിന്റെ സംശയം. തൊണ്ടിമുതലുകൾ സമീപത്തെ തോട്ടിലേക്ക് വലിച്ചെറിഞ്ഞെന്നായിരുന്നു 17കാരനായ ഒന്നാം പ്രതിയുടെ ആദ്യ മൊഴി. എന്നാൽ ഇവ കുറ്റിക്കാട്ടിലേക്കാണ് എറിഞ്ഞതെന്നായിരുന്നു മറ്റൊരു പ്രതിയായ ഉമർ അന്വേഷണസംഘത്തോട് പറഞ്ഞത്. പരസ്പരവിരുദ്ധമായ ഈ മൊഴികൾ അന്വേഷണത്തെ കൂടുതൽ സങ്കീർണമാക്കിയിരിക്കുകയാണ്.

 

തെളിവുകൾക്കായി കാടും തോടും അരിച്ചുപെറുക്കിയിട്ടും പോലീസിന് നിരാശയായിരുന്നു ഫലം. കഴിഞ്ഞദിവസം കാടുമൂടിയ പ്രദേശങ്ങളിൽ വിശദമായ പരിശോധന നടത്തിയ അന്വേഷണസംഘം പിന്നീട് സമീപത്തെ തെറ്റിയാർ തോട്ടിലും തിരച്ചിൽ നടത്തി. സ്കൂബ ഡൈവിങ് സംഘത്തിന്റെ സഹായത്തോടെ മണിക്കൂറുകളോളം നടത്തിയ പരിശോധനയിലും നിർണായകമായ ഒന്നും കണ്ടെത്താനായില്ല. തോട്ടിലും കുറ്റിക്കാട്ടിലും തെളിവുകൾക്കായി തിരച്ചിൽ നടത്തിയിട്ടും ഫലമുണ്ടാകാത്തതോടെ തൊണ്ടിമുതലുകൾ മറ്റെവിടെയെങ്കിലും കൊണ്ടുപോയി നശിപ്പിച്ചിരിക്കാമെന്ന സംശയത്തിലാണ് പോലീസ്. കൊലപാതകവുമായി ബന്ധപ്പെട്ട നിർണായക തെളിവുകൾ ഇനിയും കണ്ടെത്താനാകാത്തത് കേസിന്റെ അന്വേഷണത്തിൽ വലിയ വെല്ലുവിളിയാണ് ഉയർത്തുന്നത്.

 

അന്വേഷണത്തിന്റെ തുടക്കം മുതൽ നാല് പ്രതികളും വ്യത്യസ്തമായ മൊഴികളാണ് നൽകുന്നതെന്നാണ് വിവരം. ഇതോടെ പ്രതികളെ വീണ്ടും കസ്റ്റഡിയിൽ വാങ്ങി ഒരുമിച്ചിരുത്തി ചോദ്യം ചെയ്യാനാണ് അന്വേഷണസംഘത്തിന്റെ തീരുമാനം. ഇതിനായി ഉടൻ കോടതിയിൽ കസ്റ്റഡി അപേക്ഷ നൽകും. ആയുധങ്ങളും വസ്ത്രങ്ങളും മൊബൈൽ ഫോണുകളും എവിടെയെന്ന ചോദ്യത്തിന് ഇതുവരെ വ്യക്തമായ ഉത്തരമില്ല. ഓരോ പ്രതിയും നൽകുന്ന മൊഴികൾക്കിടയിലെ വൈരുധ്യങ്ങൾ പരിശോധിച്ച് തെളിവുകൾ കണ്ടെത്താനാണ് പോലീസിന്റെ അടുത്ത നീക്കം. രണ്ടാഴ്ച പിന്നിട്ടിട്ടും തൊണ്ടിമുതലുകൾ കണ്ടെത്താനാകാത്ത സാഹചര്യത്തിൽ അഭിരാം കൊലക്കേസിലെ നിർണായക തെളിവുകൾ എവിടെയെന്ന ചോദ്യം ബാക്കിയാണ്.