അഹമ്മദാബാദ്: പുണ്യസ്ഥലങ്ങൾ സന്ദർശിക്കാമെന്ന ആഗ്രഹത്തോടെ യാത്രയ്ക്കായി കാത്തിരുന്ന നൂറുകണക്കിന് വയോധികർക്ക് മുന്നിൽ ഒടുവിൽ ബാക്കിയായത് വഞ്ചനയുടെ ഞെട്ടിക്കുന്ന അനുഭവം. പതിനൊന്ന് ദിവസത്തെ ഹരിദ്വാർ തീർഥാടനം സൗജന്യമായി നടത്താമെന്ന വാഗ്ദാനവുമായി എത്തിയ സംഘം അഞ്ഞൂറോളം പേരിൽനിന്ന് പണം വാങ്ങി മുങ്ങിയെന്നാണ് പരാതി. ഒരാളിൽനിന്ന് 4,200 രൂപ വീതമാണ് സംഘം ഈടാക്കിയത്. ഇതനുസരിച്ച് ഏകദേശം 21 ലക്ഷം രൂപയോളം തട്ടിപ്പിനിരയായവരിൽനിന്ന് ശേഖരിക്കപ്പെട്ടതായാണ് കണക്ക്. നവംബർ 11-ന് യാത്ര ആരംഭിക്കുമെന്നായിരുന്നു സംഘാടകർ അറിയിച്ചിരുന്നത്. എന്നാൽ യാത്രാദിവസം അടുത്തെത്തിയപ്പോൾ മൊബൈൽ ഫോണുകൾ സ്വിച്ച് ഓഫ് ചെയ്യുകയും ഓഫീസ് പൂട്ടി സംഘം അപ്രത്യക്ഷമാകുകയും ചെയ്തു. ലുനവാഡയിലെ വർധാരി റോഡിലും ഗോത്ര റോഡിലും ഓഫീസ് പ്രവർത്തിച്ചിരുന്നതായി റിപ്പോർട്ടുകളുണ്ട്.

 

തട്ടിപ്പിന്റെ രീതി കൂടുതൽ ആസൂത്രിതമായിരുന്നുവെന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്. തീർഥാടനത്തിനായി പണം നൽകുന്നവർക്ക് യാത്രയ്ക്കിടെ മതപ്രഭാഷണങ്ങളിൽ പങ്കെടുക്കുന്നതിലൂടെ ദിവസേന 600 രൂപ വീതം ലഭിക്കുമെന്നും സംഘാടകർ വാഗ്ദാനം ചെയ്തിരുന്നു. ഇതോടെ പതിനൊന്ന് ദിവസത്തെ യാത്ര പൂർണമായും സൗജന്യമാകുമെന്നായിരുന്നു ഇവരുടെ ഉറപ്പ്. യാത്രയുടെ വിവരങ്ങൾ ഉൾപ്പെടുത്തിയ നോട്ടീസുകൾ സംസ്ഥാനത്തിന്റെ വിവിധ ഭാഗങ്ങളിൽ വ്യാപകമായി വിതരണം ചെയ്തിരുന്നു. വനിതാ സംഘടനാംഗങ്ങൾക്കായി പ്രത്യേക ഹരിദ്വാർ തീർഥാടനം സംഘടിപ്പിക്കുമെന്നായിരുന്നു തട്ടിപ്പിനിരയായ ഒരു സ്ത്രീയോട് പറഞ്ഞിരുന്നത്. സംഘാടകരുടെ വിശ്വാസ്യതയെക്കുറിച്ച് സംശയം ഉന്നയിച്ചപ്പോൾ തങ്ങൾ തട്ടിപ്പുകാരല്ലെന്ന് ഉറപ്പുനൽകിയതായും ഇവർ വെളിപ്പെടുത്തി. ഈ വാഗ്ദാനങ്ങളിൽ വിശ്വസിച്ചാണ് നിരവധി വയോധികരും വനിതാ സംഘടനാംഗങ്ങളും യാത്രയ്ക്കായി രജിസ്റ്റർ ചെയ്തത്.

 

എന്നാൽ പണം നഷ്ടമായതിനു പുറമേ മറ്റൊരു ഗുരുതരമായ ആശങ്കയും ഇപ്പോൾ ഇരകളെ അലട്ടുന്നുണ്ട്. യാത്രയ്ക്കായി രജിസ്റ്റർ ചെയ്തവരിൽനിന്ന് 4,200 രൂപ വാങ്ങിയതിനൊപ്പം ഫോട്ടോ, ആധാർ കാർഡ് തുടങ്ങിയ വ്യക്തിഗത വിവരങ്ങളും സംഘം ശേഖരിച്ചിരുന്നു. തട്ടിപ്പുകാർ അപ്രത്യക്ഷമായതോടെ ഈ രേഖകൾ ദുരുപയോഗം ചെയ്യപ്പെടുമോയെന്ന ഭീതിയിലാണ് വയോധികരും കുടുംബങ്ങളും. സമാനമായ രീതിയിൽ വിവിധ സ്ഥലങ്ങളിലും തട്ടിപ്പ് നടന്നതായി വിവരങ്ങൾ ലഭിച്ചിട്ടുണ്ട്. യാത്രയുടെ പേരിൽ ഓഫീസുകൾ വാടകയ്ക്കെടുത്ത് പരസ്യം നൽകിയും മതപരമായ വിശ്വാസത്തെ ഉപയോഗിച്ചുമാണ് സംഘം ആളുകളെ ആകർഷിച്ചതെന്നാണ് പരാതി. പണവുമായി മുങ്ങിയ സംഘാടകരെ കണ്ടെത്താനുള്ള തിരച്ചിൽ തുടരുകയാണ്. പുണ്യയാത്രയെന്ന പ്രതീക്ഷയിൽ വിശ്വസിച്ച് പണം നൽകിയ നൂറുകണക്കിന് ആളുകൾക്ക് ഇപ്പോൾ യാത്രയും പണവും മാത്രമല്ല, സ്വന്തം തിരിച്ചറിയൽ രേഖകളുടെ സുരക്ഷയെക്കുറിച്ചുള്ള ആശങ്കയും ബാക്കിയാകുകയാണ്.