കൊണ്ടോട്ടി: വാഹനത്തിന് പിഴയടയ്ക്കാനുണ്ടെന്ന വ്യാജ സന്ദേശത്തിൽനിന്ന് ഫോണിലെ ലിങ്കിൽ പ്രവേശിച്ചയാൾക്ക് നഷ്ടപ്പെട്ടത് 3,89,496 രൂപ. നമ്പോലൻകുന്ന് സ്വദേശിയായ നാൽപ്പത്തൊന്നുകാരന്റെ ബാങ്ക് അക്കൗണ്ടിൽനിന്നാണ് തുക നഷ്ടപ്പെട്ടത്.

 

കഴിഞ്ഞ എട്ടിന് ഉച്ചയോടെയാണ് വാഹനത്തിന് ഫൈൻ അടയ്ക്കാനുണ്ടെന്ന അറിയിപ്പ് ഫോണിൽ എത്തിയത്. സന്ദേശത്തിനൊപ്പം ഓൺലൈനായി തുക അടയ്ക്കാനുള്ള ലിങ്കും നൽകിയിരുന്നു. ഈ ലിങ്കിൽ ക്ലിക്ക് ചെയ്ത് പരിശോധിച്ചപ്പോൾ ഔദ്യോഗിക രൂപത്തിലുള്ള ‘പരിവാഹൻ ആപ്പ്’ ആണ് തുറന്നുവന്നത്. തുടർന്ന് വാഹനത്തിന്റെ നമ്പർ നൽകാൻ ആവശ്യപ്പെടുകയും, നമ്പർ നൽകിയതോടെ പത്ത് തവണകളായി അക്കൗണ്ടിൽനിന്ന് പണം പിൻവലിക്കപ്പെടുകയുമായിരുന്നു. സംഭവത്തിൽ കൊണ്ടോട്ടി പോലീസ് കേസെടുത്ത് അന്വേഷണം ആരംഭിച്ചു.

 

സൈബർ തട്ടിപ്പുകൾക്കെതിരെ ജാഗ്രത പാലിക്കുക. ഔദ്യോഗിക വെബ്‌സൈറ്റുകളോ ആപ്പുകളോ അല്ലാത്ത അപരിചിതമായ ലിങ്കുകളിൽ ക്ലിക്ക് ചെയ്യാതിരിക്കുക. ഇത്തരം സന്ദേശങ്ങൾ ലഭിച്ചാൽ ഔദ്യോഗിക സംവിധാനങ്ങൾ വഴി മാത്രം സ്ഥിരീകരിക്കുക.