ഡൽഹി: നഗ്നചിത്രങ്ങൾ അയച്ചുനൽകി പകരമായി ഇന്ത്യയുടെ അതീവ രഹസ്യ സൈനിക വിവരങ്ങൾ ചോർത്തിയെന്ന ഗുരുതര ആരോപണത്തിൽ വ്യോമസേനാ ഉദ്യോഗസ്ഥനെതിരെ കുറ്റപത്രം സമർപ്പിച്ച് ഡൽഹി പൊലീസ്. പാക് രഹസ്യാന്വേഷണ ഏജൻസിക്കുവേണ്ടി പ്രവർത്തിക്കുന്നുവെന്ന് സംശയിക്കുന്ന യുവതി സമൂഹമാധ്യമങ്ങളിലൂടെ ഉദ്യോഗസ്ഥനെ ഹണിട്രാപ്പിൽ കുടുക്കുകയായിരുന്നുവെന്നാണ് അന്വേഷണത്തിൽ കണ്ടെത്തിയത്. ഇന്ത്യയുടെ യുദ്ധപദ്ധതികൾ, ലേ വ്യോമതാവളത്തിന്റെ പ്രവർത്തനശേഷി, ഡ്രോൺ യുദ്ധതന്ത്രങ്ങൾ തുടങ്ങിയ നിർണായക വിവരങ്ങൾ യുവതിക്ക് കൈമാറിയെന്നാണ് കുറ്റപത്രത്തിലെ ആരോപണം. 2026 ജനുവരി 12 മുതൽ ഏപ്രിൽ ഒന്ന് വരെയുള്ള കാലയളവിൽ വാട്സാപ്പിലൂടെ ഇരുവരും നടത്തിയ ആശയവിനിമയത്തിന്റെ വിശദാംശങ്ങളും അന്വേഷണസംഘം പുറത്തുകൊണ്ടുവന്നിട്ടുണ്ട്. 3,008 സന്ദേശങ്ങൾ, 65 ചിത്രങ്ങൾ, 42 വോയ്സ് കോളുകൾ, നാല് വീഡിയോ കോളുകൾ, ആറു ലിങ്കുകൾ എന്നിവയാണ് കൈമാറിയത്. യുവതി അയച്ച അശ്ലീല ചിത്രങ്ങൾക്ക് പകരമായാണ് ഉദ്യോഗസ്ഥൻ രഹസ്യവിവരങ്ങൾ നൽകിയതെന്നും ഓരോ ചിത്രത്തിനും പകരം യുദ്ധപദ്ധതിയുടെ ഓരോ പേജ് വീതം കൈമാറിയെന്നും കുറ്റപത്രത്തിൽ പറയുന്നു.

 

വ്യോമസേനയുടെ അതീവ രഹസ്യ ഡ്രോൺ യൂണിറ്റുമായി ബന്ധപ്പെട്ട വിവരങ്ങളും ഉദ്യോഗസ്ഥൻ ചോർത്തിയെന്നാണ് അന്വേഷണത്തിലെ കണ്ടെത്തൽ. യൂണിറ്റിന്റെ അംഗബലം, ഘടന, പ്രവർത്തനശേഷി, ഡ്രോൺ പരീക്ഷണങ്ങൾ, പറക്കൽ ശേഷി എന്നിവയുൾപ്പെടെയുള്ള വിവരങ്ങൾ ഇതിൽ ഉൾപ്പെടുന്നു. യുദ്ധമുണ്ടായാൽ സൈന്യത്തെ വിന്യസിക്കാൻ നിശ്ചയിച്ചിരുന്ന തന്ത്രപ്രധാന സ്ഥലങ്ങൾ, ലേയിലെ യുദ്ധവിമാനങ്ങളുടെ വിന്യാസം, സൂറത്ത്ഗഢിലെ മഹാജൻ ഫീൽഡ് ഫയറിങ് റേഞ്ചിൽ നടന്ന സൈനികാഭ്യാസം എന്നിവയെക്കുറിച്ചുള്ള വിവരങ്ങളും കൈമാറിയതായി ആരോപണമുണ്ട്. ഇതിലും ഗുരുതരമായി, ഉദ്യോഗസ്ഥന്റെ മൊബൈലിലെയും മറ്റ് ഡിജിറ്റൽ ഉപകരണങ്ങളിലെയും വിവരങ്ങൾ ചോർത്തുന്നതിനായി യുവതി മാൽവെയർ ആപ്ലിക്കേഷനുകൾ അയച്ചുനൽകിയതായും കണ്ടെത്തി. യുവതിയുടെ നിർദേശപ്രകാരം ഉദ്യോഗസ്ഥന്റെ കീഴിൽ പ്രവർത്തിക്കുന്ന മറ്റ് അഞ്ച് ഉദ്യോഗസ്ഥരുടെ ഫോണുകളിലും സമാനമായ മാൽവെയർ ഇൻസ്റ്റാൾ ചെയ്തതായാണ് കുറ്റപത്രത്തിലെ മറ്റൊരു പ്രധാന ആരോപണം.

 

വ്യോമസേനാ അധികൃതർ നൽകിയ പരാതിയുടെ അടിസ്ഥാനത്തിൽ 2026 മേയ് 30നാണ് കമാൻഡറെ ഡൽഹി പൊലീസ് അറസ്റ്റ് ചെയ്തത്. സമൂഹമാധ്യമങ്ങളിലൂടെ പരിചയപ്പെട്ട യുവതി പാക് രഹസ്യാന്വേഷണ ഏജൻസികൾക്കുവേണ്ടി പ്രവർത്തിക്കുന്നയാളാണെന്ന് അന്വേഷണത്തിൽ വ്യക്തമായതായാണ് റിപ്പോർട്ട്. വ്യക്തിപരമായ അടുപ്പവും അശ്ലീല ചിത്രങ്ങളും ഉപയോഗിച്ച് സൈനിക ഉദ്യോഗസ്ഥനെ സ്വാധീനിച്ച് അതീവ രഹസ്യ വിവരങ്ങൾ ശേഖരിക്കുകയായിരുന്നു ലക്ഷ്യമെന്നാണ് അന്വേഷണസംഘത്തിന്റെ കണ്ടെത്തൽ. രാജ്യത്തിന്റെ യുദ്ധതന്ത്രങ്ങളും സൈനിക വിന്യാസവും ഡ്രോൺ ശേഷിയും ഉൾപ്പെടെയുള്ള നിർണായക വിവരങ്ങൾ ചോർന്നെന്ന ആരോപണം സുരക്ഷാ സംവിധാനങ്ങളുടെ ജാഗ്രതയെക്കുറിച്ചും ഗൗരവമായ ചോദ്യങ്ങൾ ഉയർത്തുകയാണ്. ഒരു ഉദ്യോഗസ്ഥനെ ഹണിട്രാപ്പിൽ കുടുക്കിയതിലൂടെ മറ്റ് അഞ്ച് പേരുടെ ഡിജിറ്റൽ ഉപകരണങ്ങളിലേക്കും കടന്നുകയറാൻ ശ്രമിച്ചെന്ന കണ്ടെത്തലും സംഭവത്തിന്റെ ഗൗരവം വർധിപ്പിക്കുന്നു.