ചേർത്തല: ആലപ്പുഴ ചേർത്തല കെഎസ്ആർടിസി ഡിപ്പോയിൽ സർവീസ് കഴിഞ്ഞെത്തുന്ന ബസുകളിൽ നിന്ന് ഡീസൽ മോഷ്ടിച്ചു വിറ്റ മൂന്ന് ജീവനക്കാരെ സസ്പെൻഡ് ചെയ്തു. മെക്കാനിക്കൽ വിഭാഗത്തിലെ ജീവനക്കാരായ കണ്ണൻ, ശരത്, ജയേഷ് എന്നിവർക്കെതിരെയാണ് നടപടി. ബസുകളുടെ മൈലേജ് തുടർച്ചയായി കുറയുന്നത് ശ്രദ്ധയിൽപ്പെട്ടതിനെ തുടർന്ന് കെഎസ്ആർടിസി ആഭ്യന്തര അന്വേഷണ വിഭാഗം നടത്തിയ രഹസ്യ സ്റ്റിംഗ് ക്യാമറ ഓപ്പറേഷനിലാണ് തട്ടിപ്പ് പുറത്തായത്.

 

അന്വേഷണ ഉദ്യോഗസ്ഥർ സ്വന്തം കൈയിൽ നിന്ന് പണം മുടക്കി ബസുകളിൽ ഒളിക്യാമറ സ്ഥാപിച്ചാണ് കള്ളന്മാരെ കുടുക്കിയത്. പ്രതിദിനം 10 മുതൽ 25 ലിറ്റർ വരെ ഡീസൽ ഇത്തരത്തിൽ ചോർത്തിയിരുന്നതായും ഏറെ നാളായി മോഷണം തുടരുകയായിരുന്നെന്നുമാണ് പ്രാഥമിക നിഗമനം. സംഭവത്തിൽ അസിസ്റ്റന്റ് ട്രാൻസ്‌പോർട്ട് ഓഫീസർ നൽകിയ പരാതിയുടെ അടിസ്ഥാനത്തിൽ ചേർത്തല പൊലീസ് തുടർനടപടികൾ സ്വീകരിക്കും.