മലപ്പുറം: ദേശീയപാതയിലെ ഗതാഗത നിയമലംഘനങ്ങൾ തടയുന്നതിനായി മോട്ടോർ വാഹന വകുപ്പ് പരിശോധനകൾ കർശനമാക്കി. മലപ്പുറം ജില്ലയിൽ നടത്തിയ പ്രത്യേക പരിശോധനയിൽ നിയമം ലംഘിച്ചതായി കണ്ടെത്തിയ 22 ഡ്രൈവർമാരുടെ ലൈസൻസ് സസ്പെൻഡ് ചെയ്യാനാണ് അധികൃതരുടെ തീരുമാനം.

 

ഹെവി വാഹനങ്ങൾ അതിവേഗ പാതയിലൂടെ സഞ്ചരിക്കുന്നതും ഫാസ്റ്റ് ട്രാക്കിൽ വാഹനങ്ങൾ നിർത്തി യാത്രക്കാരെ കയറ്റുന്നതും ഇനി അനുവദിക്കില്ല. കൂടാതെ, അനധികൃത പാർക്കിംഗിനും തെറ്റായ ദിശയിലൂടെ വാഹനമോടിക്കുന്നതിനുമെതിരെ പിഴയും പ്രോസിക്യൂഷൻ നടപടികളും ഉൾപ്പെടെയുള്ള കർശന ശിക്ഷകൾ ഉണ്ടാകും.

 

അപകടങ്ങൾ ഒഴിവാക്കുന്നതിനായി സ്കൂൾ, കോളേജ് വിദ്യാർഥികൾക്കിടയിൽ പ്രത്യേക ബോധവൽക്കരണ ക്ലാസുകളും എംവിഡി സംഘടിപ്പിക്കുന്നുണ്ട്. ആളുകൾ റോഡ് മുറിച്ചുകടക്കാൻ സാധ്യതയുള്ള പ്രധാന ഇടങ്ങളിൽ ബാരിക്കേഡുകൾ സ്ഥാപിക്കാൻ ദേശീയപാത അതോറിറ്റിക്കും നിർദേശം നൽകിയിട്ടുണ്ട്.