ലണ്ടൻ∙ കഴിഞ്ഞ 16 വർഷമായി യുകെയിൽ കഴിയുന്ന ഇന്ത്യൻ പ്രീമിയർ ലീഗ് (ഐപിഎൽ) മുൻ ചെയർമാൻ ലളിത് മോദി ബ്രിട്ടിഷ് പൗരത്വം സ്വീരകരിച്ചു. ഓക്സ്ഫോർഡ് യൂണിയനിൽ നടത്തിയ പ്രസംഗത്തിനിടെയാണ് തനിക്ക് ബ്രിട്ടിഷ് പൗരത്വം ലഭിച്ച വിവരം ലളിത് മോദി അറിയിച്ചത്. കഴിഞ്ഞ സെപ്റ്റംബർ 15-നാണ് ഔദ്യോഗികമായി പൗരത്വം ലഭിച്ചതെന്നും യുകെയിൽ നടന്ന ചടങ്ങിൽ കുടുംബാംഗങ്ങളും സുഹൃത്തുക്കളും പങ്കെടുത്തതായും അദ്ദേഹം എക്സിൽ പങ്കുവച്ച കുറിപ്പില്‍ വ്യക്തമാക്കി.

 

ബ്രിട്ടിഷ് പൗരത്വം ലഭിച്ചത് ‌‘‘അഭിമാനകരമായ നിമിഷവും ഒരു പുതിയ അധ്യായവുമാണെന്ന്’’ ലളിത് മോദി പറഞ്ഞത്. ചാൾസ് രാജാവിന്റെ ജന്മദിനത്തിൽ തന്നെയാണ് താൻ ഈ സന്തോഷവാർത്ത പങ്കുവയ്ക്കുന്നതെന്നും അദ്ദേഹം അറിയിച്ചു.

 

‘‘വര്‍ഷങ്ങളായി ബ്രിട്ടൻ എന്റെ വീടാണ്. ഇവിടുത്തെ ജനങ്ങളെയും വ്യവസ്ഥിതിയേയും പാരമ്പര്യ മൂല്യങ്ങളേയും ഞാൻ ആഴത്തിൽ സ്നേഹിക്കുകയും ബഹുമാനിക്കുകയും ചെയ്യുന്നു. ബ്രിട്ടിഷ് പൗരനാവുക എന്നത് വലിയൊരു ഉത്തരവാദിത്തവും പദവിയുമാണ്. അഭിമാനത്തോടെയും കൃതജ്ഞതയോടും കൂടി ഞാൻ അത് ഏറ്റെടുക്കുന്നു’’–ലളിത് മോദി എക്സിൽ കുറിച്ചു. വിവിധ സംസ്കാരങ്ങളിലൂടെയും അനുഭവങ്ങളിലൂടെയുമാണ് തന്റെ ജീവിതയാത്ര കടന്നുപോയതെന്നും സ്വന്തം വീടെന്ന് അഭിമാനത്തോടെ വിളിക്കുന്ന ഈ രാജ്യത്തിന് മികച്ച സംഭാവനകൾ നൽകാൻ ആഗ്രഹിക്കുന്നുവെന്നും അദ്ദേഹം വ്യക്തമാക്കി.

 

2010-ലെ ഐപിഎൽ ഫൈനലിന് തൊട്ടുപിന്നാലെ സാമ്പത്തിക തിരിമറി, അച്ചടക്കലംഘനം എന്നീ ആരോപണങ്ങളെത്തുടർന്ന് ബിസിസിഐ ലളിത് മോദിയെ സസ്‌പെൻഡ് ചെയ്തിരുന്നു. പിന്നാലെയാണ് അദ്ദേഹം ഇന്ത്യ വിട്ടത്. ആഭ്യന്തര അന്വേഷണത്തിൽ കുറ്റക്കാരനാണെന്ന് കണ്ടെത്തിയതിനെത്തുടർന്ന് 2013-ൽ ബിസിസിഐ അദ്ദേഹത്തിന് ആജീവനാന്ത വിലക്ക് ഏർപ്പെടുത്തുകയും ചെയ്തിരുന്നു.