സോഷ്യൽ മീഡിയ പ്ലാറ്റ്‌ഫോമായ എക്സ് കണ്ടന്റ് ക്രിയേറ്റർമാർക്ക് കർശനമായ പുതിയ മുന്നറിയിപ്പ് നൽകിയിരിക്കുകയാണ്. യുദ്ധങ്ങളോ സായുധ പോരാട്ടങ്ങളോ സംബന്ധിച്ച വ്യാജ വിഡിയോകൾ നിർമ്മിത ബുദ്ധി (AI) ഉപയോഗിച്ച് നിർമ്മിച്ച് യഥാർഥ്യമെന്ന രീതിയിൽ പങ്കുവെച്ചാൽ ഇനി പണി പാളും.

 

യുദ്ധരംഗങ്ങൾ എഐ ഉപയോഗിച്ച് നിർമ്മിച്ചതാണെങ്കിൽ അത് വ്യക്തമായി വെളിപ്പെടുത്തണം (Disclosure). ഇങ്ങനെ ചെയ്യാത്ത ക്രിയേറ്റർമാരെ എക്സിന്റെ അഡ്‌വെർടൈസിങ് റെവന്യൂ ഷെയറിങ് പ്രോഗ്രാമിൽ നിന്നും പുറത്താക്കും.

 

ആദ്യ തവണ നിയമം ലംഘിച്ചാൽ 90 ദിവസത്തേക്ക് (3 മാസം) വരുമാനം തടഞ്ഞുവെക്കും. സസ്‌പെൻഷൻ കാലാവധിക്ക് ശേഷവും ഇത് തുടർന്നാൽ ആ അക്കൗണ്ടിനെ മോണിറ്റൈസേഷൻ പ്രോഗ്രാമിൽ നിന്ന് സ്ഥിരമായി പുറത്താക്കും.

 

എന്തുകൊണ്ട് ഈ നിയന്ത്രണം?

 

ഭൗമരാഷ്ട്രീയ തർക്കങ്ങളും യുദ്ധങ്ങളും നടക്കുമ്പോൾ തെറ്റായ വിവരങ്ങൾ പ്രചരിക്കുന്നത് തടയാനാണ് ഈ നീക്കമെന്ന് എക്സ് ഹെഡ് ഓഫ് പ്രൊഡക്റ്റ് വ്യക്തമാക്കി. “യുദ്ധസമയത്ത് കൃത്യമായ വിവരങ്ങൾ ജനങ്ങളിൽ എത്തേണ്ടത് അനിവാര്യമാണ്. ഇന്നത്തെ എഐ സാങ്കേതികവിദ്യ ഉപയോഗിച്ച് ആളുകളെ തെറ്റിദ്ധരിപ്പിക്കുന്ന ദൃശ്യങ്ങൾ നിർമ്മിക്കുന്നത് വളരെ എളുപ്പമാണ്,” അദ്ദേഹം കുറിച്ചു.

 

വ്യാജ എഐ വിഡിയോകൾ കണ്ടെത്താൻ പ്രധാനമായും രണ്ട് വഴികളാണ് എക്സ് ഉപയോഗിക്കുന്നത്:

 

എഐ ഡിറ്റക്ഷൻ ടൂളുകൾ: എഐ നിർമ്മിത ദൃശ്യങ്ങൾ തിരിച്ചറിയാനുള്ള അത്യാധുനിക സോഫ്റ്റ്‌വെയറുകൾ.

 

കമ്മ്യൂണിറ്റി നോട്ട്സ് (Community Notes): ഉപയോക്താക്കൾ തന്നെ വിവരങ്ങൾ വസ്തുതാപരമാണോ എന്ന് പരിശോധിക്കുന്ന സംവിധാനം.

 

നിലവിൽ സായുധ പോരാട്ടങ്ങൾ കാണിക്കുന്ന വിഡിയോകൾക്കാണ് ഈ നിയമം ബാധകമെങ്കിലും, രാഷ്ട്രീയ പ്രചരണങ്ങൾക്കും മറ്റും എഐ ഉപയോഗിക്കുന്നതിനെതിരെയും വരുംദിവസങ്ങളിൽ കർശന നടപടിയുണ്ടാകാൻ സാധ്യതയുണ്ട്. ചുരുക്കത്തിൽ, കൂടുതൽ വ്യൂസിനും പണത്തിനും വേണ്ടി വ്യാജ യുദ്ധ വിഡിയോകൾ എഐ വഴി നിർമ്മിച്ച് എക്സിൽ പോസ്റ്റ് ചെയ്യുന്നവർക്ക് ഇനി ‘കീശ കാലിയാകാൻ’ അധികം സമയം വേണ്ടിവരില്ല.