കൊല്ലം ∙ റോഡ് ഗതാഗത നിയമലംഘനങ്ങൾക്ക് ശിക്ഷയായി ലൈസൻസ് സസ്പെൻഡ് ചെയ്യപ്പെട്ടവർക്ക് ലൈസൻസ് തിരികെ ലഭിക്കുന്നതിന് മോട്ടർ വാഹനവകുപ്പ് ഏർപ്പെടുത്തിയിരുന്ന നിർബന്ധ പരിശീലനത്തിന്റെ ദിവസത്തിൽ ഇളവ്. ഏതു കുറ്റത്തിൽ ലൈസൻസ് സസ്പെൻഡ് ചെയ്താലും 5 ദിവസമായിരുന്നു നിർബന്ധ പരിശീലനം. ഇതിൽ കുറ്റകൃത്യത്തിന്റെ തീവ്രത അനുസരിച്ച് ലൈസൻസ് സസ്പെൻഡ് ചെയ്യപ്പെട്ടവരുടെ പരിശീലന ദിവസമാണ് കുറയ്ക്കുന്നത്.

 

മദ്യപിച്ച് വാഹനമോടിച്ച് അപകടമുണ്ടാകുക, അപകടകരമായ ഡ്രൈവിങ് മൂലം മരണം സംഭവിക്കുക, മദ്യപിച്ച് വാഹനമോടിച്ച് പരുക്കേൽപ്പിക്കുക എന്നീ ഗുരുതരമായ കുറ്റകൃത്യങ്ങൾക്ക് 5 ദിവസത്തെ പരിശീലനം നിർബന്ധമാണ് . ഇൗ കുറ്റകൃത്യത്തിന് ഒരു വർഷം വരെയാണ് ലൈസൻസ് സസ്പെൻഡ് ചെയ്യുന്നത്.

 

മദ്യപിച്ച് വാഹനമോടിക്കുക (മരണമോ പരുക്കോ ഇല്ലാത്ത സാഹചര്യം), അമിത വേഗം, സുരക്ഷിതമല്ലാത്ത രീതിയിൽ വാഹനമോടിക്കുക, അപകടകരമായ ഡ്രൈവിങ് (അപകടമില്ലെങ്കിൽ) എന്നിവയ്ക്ക് 3 ദിവസത്തെ പരിശീലനം മതിയാകും.