നാളുകളായി സോഷ്യൽ മീഡിയയിൽ ചർച്ചയായിരുന്ന ജീവ ജോസഫ്–അപർണ തോമസ് വേർപിരിയലിന് സ്ഥിരീകരണം. 11 വർഷത്തെ ദാമ്പത്യജീവിതത്തിന് പിന്നാലെ ഇരുവരും വേർപിരിഞ്ഞതായി അപർണ തോമസ് സോഷ്യൽ മീഡിയയിലൂടെ വ്യക്തമാക്കി. നേരത്തെ ജീവയും ബന്ധം അവസാനിപ്പിക്കുന്നതായി അറിയിച്ചിരുന്നു.

 

തന്റെ ഭാഗത്തുനിന്നുള്ള പ്രതികരണത്തിനായി നിരവധി പേർ കാത്തിരിക്കുകയാണെന്ന് അറിയാമെന്നും അതിനാലാണ് ഇക്കാര്യം നേരിട്ട് പറയുന്നതെന്നും അപർണ കുറിപ്പിൽ വ്യക്തമാക്കി. വിവാഹബന്ധം അവസാനിച്ചെന്നും അത് തുടരാൻ തനിക്ക് താൽപര്യമില്ലായിരുന്നുവെന്നും അപർണ തുറന്നുപറഞ്ഞു.

 

ഇരുവർക്കും എളുപ്പത്തിൽ എടുക്കാൻ കഴിയുന്ന തീരുമാനമായിരുന്നില്ല ഇതെന്നും, എന്നാൽ സ്വന്തം ജീവിതത്തിനായി താൻ എടുക്കേണ്ട തീരുമാനമായിരുന്നുവെന്നും അപർണ പറഞ്ഞു. ഇപ്പോൾ ജീവിതത്തിൽ താൻ ഏറെ സമാധാനത്തിലാണെന്നും സന്തോഷത്തോടെയും സുരക്ഷിതത്വത്തോടെയും മുന്നോട്ടുപോകുകയാണെന്നും അവർ കുറിച്ചു. ഏറെക്കാലത്തിന് ശേഷം മനസ്സിലെ ഭാരമൊഴിഞ്ഞ അനുഭവമാണെന്നും അപർണ വ്യക്തമാക്കി.

 

എന്നാൽ വേർപിരിയലിലേക്ക് നയിച്ച കാര്യങ്ങൾ വിശദീകരിക്കാൻ തനിക്ക് താൽപര്യമില്ലെന്നും അപർണ വ്യക്തമാക്കി. ചില കാര്യങ്ങൾ വ്യക്തിപരമായി തന്നെ സൂക്ഷിക്കേണ്ടതുണ്ടെന്നും അതിനാൽ സംഭവിച്ചതെല്ലാം വിശദീകരിക്കുന്നതിൽ നിന്ന് വിട്ടുനിൽക്കുകയാണെന്നും അവർ പറഞ്ഞു.

 

ഇനി സമാധാനത്തോടെ ജീവിതവുമായി മുന്നോട്ടുപോകാനാണ് ആഗ്രഹമെന്നും അപർണ വ്യക്തമാക്കി. തന്റെയും ജീവയുടെയും സ്വകാര്യതയെ മാനിക്കണമെന്നും ഈ ഘട്ടത്തിൽ ആവശ്യമായ വ്യക്തിഗത ഇടം നൽകണമെന്നും അവർ ആരാധകരോട് അഭ്യർഥിച്ചു.

 

2015 ആഗസ്റ്റ് 24നായിരുന്നു ജീവയും അപർണയും വിവാഹിതരായത്. ടെലിവിഷൻ അവതാരകരെന്ന നിലയിൽ ശ്രദ്ധ നേടിയ ഇരുവരും പിന്നീട് സോഷ്യൽ മീഡിയയിലും ഏറെ ജനപ്രീതി നേടിയ താരദമ്പതികളായി മാറുകയായിരുന്നു. 11 വർഷത്തെ ബന്ധത്തിനൊടുവിലാണ് ഇരുവരും വേർപിരിയാൻ തീരുമാനിച്ചത്.

 

വേർപിരിയലിന്റെ കൃത്യമായ കാരണം ഇരുവരും വെളിപ്പെടുത്തിയിട്ടില്ല. വ്യക്തിപരമായ കാരണങ്ങളാണ് തീരുമാനത്തിന് പിന്നിലെന്നാണ് ഇരുവരുടെയും പ്രതികരണങ്ങളിൽ നിന്ന് വ്യക്തമാകുന്നത്.