കോഴിക്കോട്∙ വിവാദമായ മുട്ടിൽ മരം മുറിയുമായി ബന്ധപ്പെട്ട് സർക്കാർ ഗൗരവമായ അന്വേഷണത്തിലേക്ക്. വ്യാപക മരം മുറിയിലേക്ക് നയിച്ച റവന്യു വകുപ്പിന്റെ വിവാദ ഉത്തരവ് പുറത്തിറങ്ങിയതിന്റെ പശ്ചാത്തലവും അതിന്റെ പിന്നിലുള്ള ഗൂഢാലോചനയും അന്വേഷിക്കാൻ വനം, റവന്യു വകുപ്പുകൾ ഒരുമിച്ചുള്ള നീക്കം തുടങ്ങി.

 

മുട്ടിൽ മരം മുറി കേസ് കോടതിയിലും ഗൗരവമായി വാദിക്കുന്നതിന്റെ പിന്നാലെയാണ് പഴയ ഉത്തരവുകളുടെ പിന്നാമ്പുറവും ചികയാൻ സർക്കാർ തീരുമാനിക്കുന്നത്. ചീഫ് സെക്രട്ടറിയായി വിരമിച്ച അന്നത്തെ റവന്യു പ്രിൻസിപ്പൽ സെക്രട്ടറി ഡോ. എ . ജയതിലകിന്റെ പങ്ക് അന്വേഷിക്കണമെന്ന് കേസിലെ മുൻ പബ്ലിക് പ്രോസിക്യൂട്ടർ ജോസഫ് മാത്യു ആവശ്യപ്പെട്ടിരുന്നു.

 

2020 ഒക്ടോബറിലെ വിവാദ റവന്യു ഉത്തരവിനെ തുടർന്നാണ് മുട്ടിൽ ഉൾപ്പെടെ കേരളത്തിലെ വനഭൂമിയിൽനിന്ന് വ്യാപകമായി സംരക്ഷിത വൃക്ഷങ്ങളായ തേക്കും ഈട്ടിയും വെട്ടിയിറക്കിയത്. വയനാട് മേപ്പാടി റേഞ്ചിലെ 14 കോടിയുടെ മരം വെട്ടിക്കടത്തിയ കേസിൽ റിപ്പോർട്ടർ ടിവി ഉടമകളായ അഗസ്റ്റിൻ സഹോദരങ്ങളാണ് പ്രധാന പ്രതികൾ. 36 കേസുകളിൽ പൊലീസിന്റെ പ്രത്യേക അന്വേഷണസംഘം സഹോദരങ്ങളെ ഉൾപ്പെടെ പ്രതികളാക്കി കുറ്റപത്രം നൽകിയിട്ടുണ്ട്. വനം വകുപ്പും കഴിഞ്ഞ ദിവസം ആദ്യ കേസിൽ കുറ്റപത്രം നൽകി.