മസ്‌കത്ത്∙ ഭക്ഷ്യവസ്തുക്കളുടെയും ആരോഗ്യ മേഖലയുടെയും ചെലവ് കുറയ്ക്കുന്ന നിര്‍ണായക നീക്കവുമായി ഒമാന്‍. ഭക്ഷ്യവസ്തുക്കള്‍, മനുഷ്യര്‍ക്കുള്ള മരുന്നുകള്‍, മെഡിക്കല്‍ ഉപകരണങ്ങള്‍, വെറ്ററിനറി മരുന്നുകള്‍ ഉള്‍പ്പെടെ 1,546 ഇനങ്ങള്‍ക്ക് ഒക്ടോബര്‍ 1 മുതല്‍ 0% വാറ്റ് പ്രാബല്യത്തില്‍ വരും. ടാക്‌സ് അതോറിറ്റിയുടെ മൂന്ന് പുതിയ തീരുമാനങ്ങളാണ് ഇതിന് വഴിയൊരുക്കുന്നത്. ഭക്ഷ്യവസ്തുക്കളില്‍ 807 ഇനങ്ങള്‍ പുതിയ 0% വാറ്റ് പട്ടികയില്‍ ഉള്‍പ്പെടുത്തിയിട്ടുണ്ട്.

 

കന്നുകാലി, കോഴി, ബീഫ്, ആട്ടിറച്ചി, ചെമ്മരിയാട്, ഒട്ടകമാംസം, മത്സ്യം, കടല്‍വിഭവങ്ങള്‍, പാലുല്‍പന്നങ്ങള്‍ എന്നിവയ്‌ക്കൊപ്പം മൃഗത്തീറ്റയും വിവിധ ഉപ്പ് ഉല്‍പന്നങ്ങളും പട്ടികയില്‍ ഉള്‍പ്പെടുന്നു. മനുഷ്യര്‍ക്കുള്ള മരുന്നുകളും മെഡിക്കല്‍ സാമഗ്രികളുമായി 677 ഇനങ്ങള്‍ക്കാണ് വാറ്റ് ഒഴിവാക്കിയത്. മരുന്നുകള്‍, ഹെര്‍ബല്‍ മരുന്നുകള്‍, ബയോളജിക്കല്‍ ഉല്‍പന്നങ്ങള്‍, മെഡിക്കല്‍ ആവശ്യത്തിനുള്ള ഭക്ഷണം, വിറ്റാമിനുകള്‍, ഹോര്‍മോണുകള്‍, മെഡിക്കല്‍ ഓക്‌സിജന്‍, ലബോറട്ടറിഡയഗ്‌നോസ്റ്റിക് ഉപകരണങ്ങള്‍, ഡെന്റല്‍ ഉപകരണങ്ങള്‍ എന്നിവ ഇതില്‍ ഉള്‍പ്പെടുന്നു.

 

വെറ്ററിനറി മേഖലയിലെ 62 ഇനങ്ങള്‍ക്കും 0% വാറ്റ് ബാധകമാകും. വാക്‌സിനുകള്‍, സീറം, ബയോളജിക്കല്‍ ഉല്‍പന്നങ്ങള്‍, ആന്റിബയോട്ടിക്കുകള്‍, വിറ്റാമിനുകള്‍, ഹോര്‍മോണുകള്‍, വെറ്ററിനറി മരുന്നുകള്‍, പരിശോധനാചികിത്സാ ഉപകരണങ്ങള്‍ എന്നിവയാണ് പ്രധാനമായും പട്ടികയിലുള്ളത്. ജീവിതച്ചെലവും ആരോഗ്യപരിചരണ ചെലവും കുറയ്ക്കുന്നതിനും കൃഷി, കന്നുകാലി വളര്‍ത്തല്‍, ഭക്ഷ്യസുരക്ഷ തുടങ്ങിയ മേഖലകള്‍ക്ക് പിന്തുണ നല്‍കുന്നതിനുമാണ് പുതിയ ഇളവ് ലക്ഷ്യമിടുന്നത്. പ്രവാസികള്‍ ഉള്‍പ്പെടെയുള്ളവരുടെ കുടുംബ ബജറ്റിന് ഏറെ ആശ്വാസമാകുന്നതാണ് സര്‍ക്കാറിന്റെ പുതിയ നീക്കം.