കോഴിക്കോട് ∙ സമൂഹ മാധ്യമങ്ങളിലൂടെ പരിചയപ്പെട്ട യുവതികളിൽ നിന്നു സ്വർണാഭരണം വാങ്ങി തട്ടിപ്പു നടത്തിയ യുവാവിനെ മെഡിക്കൽ കോളജ് പൊലീസ് രാത്രി വടകരയിലെ വീടു വളഞ്ഞു പിടികൂടി. വടകര മയ്യന്നൂർ പല്ലുള്ളപറമ്പത്ത് പി.പി.മുഹമ്മദ് നജീറിനെ (30) ആണ് മെഡിക്കൽ കോളജ് സിഐ ബൈജു കെ.ജോസിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. പ്രതിയും കൂട്ടാളികളും വിവിധ ജില്ലകളിൽ നിന്നു 80 പവനോളം സ്വർണാഭരണം തട്ടിപ്പിലൂടെ മോഷ്ടിച്ചതായി പൊലീസ് പറഞ്ഞു.

 

ജൂലൈയിൽ പന്നിയങ്കര കണ്ണഞ്ചേരി സ്വദേശിയായ യുവതി നൽകിയ പരാതിയിലാണ് പ്രതി പിടിയിലായത്. യുവതിയെ വാട്സാപ്പിലൂടെ പരിചയപ്പെട്ട പ്രതി സൗഹൃദം സ്ഥാപിക്കുകയായിരുന്നു. കയ്യിലെ സ്വർണാഭരണം അതേ മോഡൽ ആഭരണം ഉണ്ടാക്കാനായി സ്കാൻ ചെയ്തു നൽകിയാൽ അതിൽ നിന്നും കൂടുതൽ വരുമാനം ലഭിക്കുമെന്ന് പറഞ്ഞു വിശ്വസിപ്പിച്ച് പ്രതി യുവതിയോട് അരയിടത്തുപാലത്തെ ജ്വല്ലറിയിൽ എത്താൻ ആവശ്യപ്പെട്ടു.