മാനന്തവാടി ∙ പിലാക്കാവ് പഞ്ചാരക്കൊല്ലയിൽ സ്കൂൾ ബസിനു നേരെ കാട്ടുപോത്തിന്റെ ആക്രമണം. തലപ്പുഴ ചിറക്കരയിൽ തേയിലത്തോട്ടത്തിൽ ഇറങ്ങിയ കാട്ടുപോത്താണ് പെട്ടെന്ന് റോഡിൽ ഇറങ്ങി സ്കൂൾ ബസിനു നേരെ പാഞ്ഞടുത്തത്. കാട്ടുപോത്തിന്റെ കുത്തേറ്റ് ബസിന്റെ വശത്തുള്ള ഗ്ലാസുകൾ തകർന്നു. ഈ ഭാഗത്തുള്ള കമ്പികൾ വളഞ്ഞ നിലയിലാണുള്ളത്. ആക്രമണത്തിൽ ബസിൽ ഉണ്ടായിരുന്ന രണ്ടു വിദ്യാർഥികൾക്ക് പരുക്കേറ്റു. ഇവരെ മാനന്തവാടി മെഡിക്കൽ കോളജ് ആശുപത്രിയിലേക്ക് കൊണ്ടുപോയി. ഇരുവരുടെയും പരുക്ക് ഗുരുതരമല്ല.

 

കണിയാരം സെന്റ് ജോസഫ് ടിടിഎയുടെ ബസിനു നേരെയായിരുന്നു കാട്ടുപോത്തിന്റെ ആക്രമണം. പ്രദേശത്ത് വന്യമൃഗശല്യം രൂക്ഷമാണെന്നും നടപടി വേണമെന്നും നാട്ടുകാർ ആവശ്യപ്പെട്ടു.