ദിവസം മോശമായാൽ ട്രോമ, പ്രണയബന്ധം തകർന്നാൽ റിലേഷൻഷിപ്പ് ട്രോമ, ജോലിസ്ഥലത്തെ സമ്മർദം പോലും വർക്ക് ട്രോമ! സോഷ്യൽ മീഡിയയിലെ സംഭാഷണങ്ങളിൽ ‘ട്രോമ’ എന്ന വാക്ക് ഇന്ന് വ്യാപകമായി ഉപയോഗിക്കപ്പെടുന്നുണ്ട്. മാനസികാരോഗ്യത്തെക്കുറിച്ച് തുറന്നുപറയാനുള്ള പ്രവണത വർധിക്കുന്നത് നല്ല കാര്യമാണെങ്കിലും, വൈകാരികമായി വേദനിപ്പിക്കുന്ന എല്ലാ അനുഭവങ്ങളെയും ട്രോമ എന്ന് വിളിക്കാനാകുമോ?

 

എന്താണ് യഥാർഥത്തിൽ സൈക്കോളജിക്കൽ ട്രോമ?

 

ഒരു വ്യക്തിയുടെ മാനസികമായി നേരിടാനുള്ള ശേഷിയെ ബാധിക്കുകയും പിന്നീട് അയാളുടെ ചിന്തകളിലും വികാരങ്ങളിലും പെരുമാറ്റത്തിലും സ്വാധീനം ചെലുത്തുകയും ചെയ്യുന്ന അതിതീവ്രമായ അനുഭവങ്ങളെയാണ് സൈക്കോളജിക്കൽ ട്രോമ എന്നു പറയുന്നത്. പീഡനം, അക്രമം, ഗുരുതരമായ അപകടങ്ങൾ, ജീവന് ഭീഷണിയുണ്ടെന്നോ സുരക്ഷിതമല്ലെന്നോ ശക്തമായി തോന്നിയ സാഹചര്യങ്ങൾ എന്നിവ ഇതിന് കാരണമാകാം.

 

ദൈനംദിന സംഭാഷണങ്ങളിൽ ട്രോമ എന്ന വാക്ക് വളരെ ലാഘവത്തോടെ ഉപയോഗിക്കപ്പെടുന്നുണ്ടെന്ന് വിദഗ്ധർ പറയുന്നു. ജോലിസ്ഥലത്തെ മോശം ദിവസം, പ്രയാസകരമായ പ്രണയബന്ധം, മറ്റൊരാളുടെ വിമർശനം എന്നിവ വേദനയുണ്ടാക്കാമെങ്കിലും അവയെല്ലാം സൈക്കോളജിക്കൽ ട്രോമയാകണമെന്നില്ല.

 

സമ്മർദവും ട്രോമയും തമ്മിലുള്ള വ്യത്യാസം എന്ത്?

 

ജോലിഭാരം, പരീക്ഷ, ബന്ധങ്ങളിലെ പ്രശ്നങ്ങൾ, മോശം അനുഭവങ്ങൾ എന്നിവയെല്ലാം സമ്മർദമുണ്ടാക്കാം. ഇത്തരം പ്രശ്നങ്ങളെ നിസ്സാരമായി കാണേണ്ടതില്ല. എന്നാൽ ട്രോമയുടെ ആഘാതം കൂടുതൽ കാലം നിലനിൽക്കുകയും ഒരു വ്യക്തിക്ക് സുരക്ഷിതത്വം അനുഭവപ്പെടുന്ന രീതിയെയും സാഹചര്യങ്ങളോടുള്ള പ്രതികരണത്തെയും മറ്റുള്ളവരുമായുള്ള ബന്ധങ്ങളെയും ബാധിക്കുകയും ചെയ്യാം.

 

അതേസമയം, ഒരു അനുഭവത്തിന്റെ ആഘാതം എത്രത്തോളമാണെന്ന് വിലയിരുത്തുമ്പോൾ വ്യക്തിയുടെ സാഹചര്യങ്ങളും പ്രതികരണങ്ങളും പരിഗണിക്കേണ്ടതുണ്ട്.

 

ട്രോമയുടെ ലക്ഷണങ്ങൾ എന്തൊക്കെയാണ്?

 

ചില അനുഭവങ്ങൾക്കുശേഷം താഴെ പറയുന്ന ബുദ്ധിമുട്ടുകൾ തുടർച്ചയായി അനുഭവപ്പെടുന്നുണ്ടെങ്കിൽ ശ്രദ്ധിക്കണം:

 

1.ആഗ്രഹിക്കാതിരുന്നിട്ടും അനുഭവത്തിന്റെ ഓർമകൾ വീണ്ടും വീണ്ടും വരിക.

 

2.പേടിപ്പെടുത്തുന്ന സ്വപ്നങ്ങൾ കാണുക.

 

3.സംഭവത്തെ ഓർമിപ്പിക്കുന്ന സാഹചര്യങ്ങളിൽനിന്ന് ഒഴിഞ്ഞുമാറുക.

 

4.എപ്പോഴും അപകടം സംഭവിക്കുമെന്ന തോന്നലോ സുരക്ഷിതമല്ലെന്ന ഭയമോ അനുഭവപ്പെടുക.

 

5.ഉറക്കത്തെയും വ്യക്തിബന്ധങ്ങളെയും ദൈനംദിന ജീവിതത്തെയും ബാധിക്കുന്ന ബുദ്ധിമുട്ടുകൾ ഉണ്ടാകുക.

 

ഈ ലക്ഷണങ്ങൾ ഉണ്ടെന്നതുകൊണ്ടുമാത്രം ട്രോമയുമായി ബന്ധപ്പെട്ട മാനസികാരോഗ്യ പ്രശ്നമുണ്ടെന്ന് ഉറപ്പിക്കാനാവില്ല. എന്നാൽ ഇത്തരം ബുദ്ധിമുട്ടുകൾ തുടർന്നാൽ വിദഗ്ധസഹായം തേടുന്നത് പ്രധാനമാണ്.

 

എല്ലാ വേദനാജനകമായ അനുഭവങ്ങളെയും ട്രോമ എന്ന് വിളിക്കേണ്ടതുണ്ടോ?

 

പ്രണയബന്ധം തകരുക, പരാജയം നേരിടുക, നിരസിക്കപ്പെടുക, സമ്മർദപൂർണമായ കാലഘട്ടത്തിലൂടെ കടന്നുപോകുക എന്നിവയെല്ലാം ഒരാളെ വൈകാരികമായി തളർത്താം. ഇത്തരം അനുഭവങ്ങളിൽ നിന്ന് മുക്തിനേടാൻ സമയവും പിന്തുണയും ആവശ്യമായി വന്നേക്കാം.

 

എന്നാൽ ഒരാളുടെ വേദന അംഗീകരിക്കാൻ ആ അനുഭവത്തെ ട്രോമ എന്നു വിളിക്കേണ്ടതില്ല. എല്ലാ വിഷമങ്ങളെയും ഒരേ പേരിൽ വിശേഷിപ്പിക്കുന്നത് സാധാരണ വൈകാരിക വിഷമവും ഗുരുതരമായ മാനസിക ആഘാതവും തമ്മിലുള്ള വ്യത്യാസം തിരിച്ചറിയുന്നത് ബുദ്ധിമുട്ടാക്കും.

 

മാനസികാരോഗ്യത്തെക്കുറിച്ച് തുറന്നുപറയുന്നതുപോലെ തന്നെ അനുഭവങ്ങളെ കൃത്യമായി മനസ്സിലാക്കുന്നതും പ്രധാനമാണ്. ഓരോ മോശം അനുഭവവും ട്രോമയല്ലെങ്കിലും, ഒരാളുടെ മാനസിക ബുദ്ധിമുട്ടുകളെ നിസ്സാരമായി കാണരുത്. ആവശ്യമുള്ളപ്പോൾ വിദഗ്ധസഹായം തേടുകയും സ്വന്തം മാനസികാരോഗ്യത്തിന് പ്രാധാന്യം നൽകുകയും ചെയ്യണം.