ബർലിൻ∙ ജർമനിയിലെ ബ്രെമാൻ/ബെർഗൗ മേഖലയിൽ ലാൻഡ്‌റാറ്റ്‌സ് ആംത്തിലെ രണ്ട് ജീവനക്കാരെ വെടിവെച്ച് കൊലപ്പെടുത്തിയ പ്രതി മുൻ പൊലീസ് ഉദ്യോഗസ്ഥനാണെന്ന് സ്ഥിരീകരിച്ചു. പതിവ് ആയുധ പരിശോധനയ്ക്കെത്തിയ ഉദ്യോഗസ്ഥരെയാണ് ആൻഡ്രിയാസ് ജി. (60) വെടിവച്ചു കൊന്നത്.

 

സംഭവത്തിനുശേഷം വീട്ടിൽ മണിക്കൂറുകളോളം പതുങ്ങിയിരുന്ന ഇയാൾ, പിന്നീട് സ്വയം പൊലീസിനെ വിളിക്കുകയായിരുന്നു. തുടർന്ന് രാത്രിയോടെ സ്ഥലത്തെത്തിയ എസ്.ഇ.കെ (SEK) സ്പെഷൽ ഫോഴ്സ് നടത്തിയ ശക്തമായ മിന്നലാക്രമണത്തിനൊടുവിൽ ഗുരുതരമായി പരുക്കേറ്റ നിലയിലാണ് പ്രതിയെ പിടികൂടിയത്.

 

പത്ത് തോക്കുകൾ സ്വന്തമായി ലൈസൻസോടുകൂടി സൂക്ഷിച്ചിരുന്ന ഇയാൾ ഒരു ഏകാന്തവാസിയെപ്പോലെയാണ് ജീവിച്ചിരുന്നതെന്ന് നാട്ടുകാർ പറയുന്നു. പെട്ടെന്ന് ഇത്തരമൊരു കൊടുംക്രൂരതയിലേക്ക് നയിച്ച കാരണം എന്താണെന്ന് വ്യക്തമല്ലെങ്കിലും, പ്രതിയുടെ ഫോണിലെയും കംപ്യൂട്ടറിലെയും ഡിജിറ്റൽ തെളിവുകൾ പരിശോധിച്ചുവരികയാണെന്ന് അധികൃതർ അറിയിച്ചു.