ഷൊർണൂർ ∙ ട്രെയിൻ യാത്രക്കാരുടെ ലാപ്ടോപ്പുകളും മൊബൈൽ ഫോണുകളും കവർന്ന കേസിൽ സിനിമാ സംവിധായകൻ അറസ്റ്റിൽ. ഈയിടെ പുറത്തിറങ്ങിയ ‘കള്ളന്മാരുടെ വീട്’ എന്ന സിനിമയുടെ സംവിധായകൻ പാലക്കാട് കരിമ്പ സ്വദേശി കാജ ഹുസൈൻ ആണ് റെയിൽവേ പൊലീസിന്റെ പിടിയിലായത്. മണ്ണാർക്കാട് പൊറ്റശ്ശേരി സ്വദേശിനിയുടെ 80,000 രൂപ വിലവരുന്ന മൊബൈൽ ഫോൺ ട്രെയിനിൽ നിന്നു മോഷണംപോയ സംഭവത്തിൽ നടത്തിയ അന്വേഷണത്തിലാണു പ്രതി പിടിയിലായത്. സിസിടിവി ദൃശ്യങ്ങൾ കേന്ദ്രീകരിച്ചു നടത്തിയ അന്വേഷണത്തിനൊടുവിലാണു പ്രതിയെ തിരിച്ചറിഞ്ഞത്.

 

മാന്യമായ വസ്ത്രധാരണത്തോടെ ട്രെയിനുകളിൽ യാത്രചെയ്ത്, യാത്രക്കാരുടെ ശ്രദ്ധ മാറുന്ന സമയത്താണു മോഷണം നടത്തിയിരുന്നതെന്നാണു പൊലീസിന്റെ കണ്ടെത്തൽ. സെക്കൻഡ് ഹാൻഡ് സാധന വ്യാപാരത്തിലെ ഇടനിലക്കാരനാണെന്നു കടക്കാരെ തെറ്റിദ്ധരിപ്പിച്ചാണ് ഇവ വിൽപന നടത്തിയിരുന്നത്. സിനിമയിൽനിന്നു പ്രതീക്ഷിച്ച സാമ്പത്തിക നേട്ടം ലഭിക്കാത്തതിനാൽ സാമ്പത്തിക ബാധ്യതകൾ തീർക്കാനാണു മോഷണത്തിലേക്കു തിരിഞ്ഞതെന്നു പ്രതി മൊഴിനൽകിയിട്ടുണ്ട്.