ദൈദ്∙ ഷാർജ ദൈദിലുണ്ടായ വാഹനാപകടകത്തിൽ വിദ്യാർഥിനി മരിച്ചു. യുഎഇ സർവകലാശാല വിദ്യാർഥിനിയായ 20 വയസ്സുകാരിയായ റാസൽഖൈമ സ്വദേശിനിയാണ് ദൈദ് റോഡിലുണ്ടായ വാഹനാപകടത്തിൽ സംഭവസ്ഥലത്തുതന്നെ മരിച്ചത്. ഇവർ സഞ്ചരിച്ച കാറിലേക്ക് പെട്രോളിയം ഉൽപന്നങ്ങളുമായി വന്ന ടാങ്കർ ഇടിച്ചുകയറുകയായിരുന്നു. കാറോടിച്ചിരുന്ന സഹപാഠിക്ക് കയ്യിൽ പരുക്കേറ്റു.

 

അൽ ഐനിലെ യുഎഇ സർവകലാശാലയിൽ നിന്ന് മടങ്ങുമ്പോഴാണ് അപകടമുണ്ടായത്. മരിച്ച വിദ്യാർഥിനി ഇരുന്ന ഭാഗത്തേക്ക് ടാങ്കർ നിയന്ത്രണം വിട്ട് ഇടിച്ചുകയറുകയായിരുന്നെന്ന് ബന്ധുക്കൾ പറഞ്ഞു. പരുക്കേറ്റ ഡ്രൈവറെ ആശുപത്രിയിൽ പ്രവേശിപ്പിച്ചു. ഇവരുടെ നില തൃപ്തികരമാണെന്ന് അധികൃതർ അറിയിച്ചു.

 

∙ കൂട്ടുകാരിയെ ഒറ്റയ്ക്കാക്കരുതെന്ന് കരുതി യാത്ര; അവസാനിച്ചത് ദുരന്തത്തിൽ

 

സർവകലാശാലയിൽ നിന്ന് പതിവുപോലെ മിനിബസിൽ റാസൽഖൈമയിലേക്ക് മടങ്ങാനായിരുന്നു വിദ്യാർഥിനി ആദ്യം തീരുമാനിച്ചിരുന്നത്. എന്നാൽ, സ്വന്തം കാറിൽ പോകുകയായിരുന്ന മറ്റൊരു സഹപാഠി ഒപ്പം വരാൻ ഇവർക്ക് ക്ഷണം നൽകി. സുഹൃത്ത് ഒറ്റയ്ക്ക് യാത്ര ചെയ്യേണ്ടി വരരുതെന്ന് കരുതിയാണ് ഇവർ സ്വകാര്യ കാറിൽ ഒപ്പം പോകാൻ തീരുമാനിച്ചതെന്ന് ബന്ധുക്കൾ പറഞ്ഞു.

 

ഈ സൗഹൃദയാത്രയാണ് ഒടുവിൽ ദൈദ് റോഡിൽ വലിയ ദുരന്തത്തിൽ കലാശിച്ചത്. ചെറുപ്പം മുതൽ ഒപ്പം പഠിച്ചവരുടെയും അധ്യാപകരുടെയും പ്രിയപ്പെട്ടവളായിരുന്നു മരിച്ച വിദ്യാർഥിനി. ആരോടും വഴക്കിടാത്ത, എപ്പോഴും സഹായമനസ്കതയോടെ പെരുമാറിയിരുന്ന കുട്ടിയായിരുന്നു അവളെന്ന് സഹപാഠികൾ ഓർമിച്ചു. വെള്ളിയാഴ്ച ജുമുഅ നമസ്കാരത്തിനുശേഷം അൽ ഉറൈബി ഖബർസ്ഥാനിൽ സംസ്കാര ചടങ്ങുകൾ നടന്നു.