ഝാൻസി ∙ ഹോട്ടൽ മുറിയിൽ നവവധു ദുരൂഹ സാഹചര്യത്തിൽ മരിച്ച സംഭവത്തിൽ ഭർത്താവിനെതിരെ ആരോപണവുമായി യുവതിയുടെ കുടുംബം. മുസ്കാൻ സിമോലിയ (28) ആണ് ഉത്തര്‍പ്രദേശിലെ ഝാൻസിയിലുള്ള ഒരു ഹോട്ടലിൽ വച്ച് കുഴഞ്ഞുവീണ് മരിച്ചത്. ഹോട്ടലിലെ സിസിടിവി ദൃശ്യങ്ങൾ പുറത്തുവന്നതോടെ മകളുടെ മരണത്തില്‍ ദുരൂഹതയുണ്ടെന്ന് ആരോപിച്ച് കുടുംബം രംഗത്തെത്തുകയായിരുന്നു.

 

മധ്യപ്രദേശിലെ വിദിഷ സ്വദേശിയായ ബാങ്ക് മാനേജർ നിലേഷും മുസ്കാനും ജൂൺ 29 നാണ് വിവാഹിതരായത്. ഒക്ടോബർ 10 ന് റെയിൽവേ ജൂനിയർ എൻജിനീയർ പരീക്ഷാ തയ്യാറെടുപ്പുകൾക്കായി മുസ്കാൻ ഝാൻസിയിലെ സ്വന്തം വീട്ടിലെത്തി. തന്‍റെ അമ്മായിയെ കാണാനെന്ന് പറഞ്ഞ് 23 ന് രാത്രി മുസ്കാനെ വീട്ടിൽ നിന്നു കൂട്ടിക്കൊണ്ടുപോയ നിലേഷ്, പക്ഷെ ഹോട്ടലിലേക്കാണ് പോയതെന്ന് യുവതിയുടെ പിതാവ് രാംജി ലാൽ അഹിർവാർ ആരോപിച്ചു. ഹോട്ടൽ ജീവനക്കാരനും ഭർത്താവിനും പിന്നാലെ യുവതി ഹോട്ടൽ മുറിയിലേക്ക് കയറുന്നത് സിസിടിവി ദൃശ്യങ്ങളിൽ കാണാം. മുറിയിലേക്ക് കയറിയ യുവതി നിമിഷങ്ങൾക്കുള്ളിൽ മുറിക്കു പുറത്തേ ഇടനാഴിയിലേക്ക് തലയടിച്ചു വീഴുകയായിരുന്നു. ഉടൻതന്നെ നിലേഷ് മുസ്കാനെ എടുത്തുയർത്തി അകത്തേക്ക് കൊണ്ടുപോയി. തുടർന്ന് പിറ്റേന്നാണ് യുവതിയെ ആശുപത്രിയിൽ പ്രവേശിപ്പിക്കുന്നതും മരണം സ്ഥിരീകരിച്ചതും. നിലേഷിനെ കസ്റ്റഡിയിലെടുത്ത് ചോദ്യം ചെയ്തുവരികയാണ്.

 

ഇൻഡോറിൽ മറ്റൊരു ഭാര്യയുള്ളത് മറച്ചുവച്ചാണ് നിലേഷ് മുസ്കാനെ വിവാഹം ചെയ്‌തതെന്ന് അടുത്തിടെയാണ് മനസ്സിലായതെന്നും ഇതേ തുടർന്ന് ദമ്പതികൾ നിരന്തരം വഴക്കിട്ടിരുന്നതായും മുസ്കാന്‍റെ പിതാവ് വ്യക്തമാക്കി. മകളുടെ തലയിൽ സാരമായ പരുക്കുകളുണ്ടെന്നും കൊലപാതകമാണെന്ന് സംശയിക്കുന്നായും പിതാവ് പറഞ്ഞു. യുവതി കുഴഞ്ഞുവീഴാനുള്ള കാരണം കണ്ടെത്താൻ സമഗ്രമായ അന്വേഷണം നടത്തണമെന്ന് കുടുംബം ആവശ്യപ്പെട്ടു. പോസ്റ്റുമോർട്ടം റിപ്പോർട്ട് പുറത്തുവന്നാൽ മാത്രമേ മരണകാരണത്തെക്കുറിച്ചും പരുക്കുകളെക്കുറിച്ചുമുള്ള വ്യക്തത ലഭിക്കൂ എന്ന് പൊലീസ് അറിയിച്ചു.