ലക്നൗ ∙ കൊലക്കേസ് പ്രതി മരിച്ചെന്ന് വരുത്തി തെളിവുകൾ ഹാജരാക്കി ശിക്ഷയിൽനിന്നും ഇളവ് നേടാൻ ശ്രമിച്ചു. എഐ സഹായത്തോടെ സംസ്കാരം അടക്കം നടത്തിയ തെളിവുകൾ ഹാജരാക്കി മരണ സർട്ടിഫിക്കറ്റ് നേടിയാണ് രക്ഷപ്പെടാൻ കരുക്കൾ നീക്കിയത്. എന്നാൽ പൊലീസിന്റെ ഇടപെടലിൽ കൊലക്കേസ് പ്രതിയുടെ തട്ടിപ്പ് പൊളിഞ്ഞു. 2016 ലെ ഒരു കൊലപാതക കേസിൽ പ്രതിയായ രാജ്ഭർ ആണ് മരിച്ചെന്ന് വരുത്തി തീർത്ത് ശിക്ഷയിൽനിന്നും ഇളവ് നേടാൻ ശ്രമിച്ചത്.

 

2016 ൽ യോഗേഷ് സിങ്ങിനെ വെടിവച്ചു കൊന്ന കേസിലാണ് രാജ്ഭറും കൂട്ടാളി സുദർശൻ രാജ്ഭറും പ്രതികളായത്. ഈ കേസിന്റെ വിചാരണ ഏകദേശം പൂർത്തിയായിരുന്നു. സാക്ഷികളുടെ വിസ്താരവും തെളിവുകളുടെ പരിശോധനയും കോടതി പൂർത്തിയാക്കി. ഈ ഘട്ടത്തിൽ കേസിൽനിന്നും തനിക്കു രക്ഷപ്പെടാനാവില്ലെന്നും ജീവപര്യന്തം തടവ് ലഭിക്കുമെന്ന് രാജ്ഭർ ഭയപ്പെട്ടിരുന്നു.

 

കൊലക്കേസിൽ പ്രതിയായ രാജ്ഭർ ഒട്ടേറെ സാമ്പത്തിക തട്ടിപ്പിലും പ്രതിയാണ്. ആളുകളിൽനിന്നും പണം വാങ്ങി ഓൺലൈൻ വ്യാപാരത്തിലും ക്രിപ്‌റ്റോകറൻസിയിലും നിക്ഷേപിച്ചും തട്ടിപ്പ് നടത്തിയിട്ടുണ്ട്. ഇത്തരത്തിൽ പണം നഷ്മായ രണ്ട് ഹോമിയോപ്പതി ഡോക്ടർമാരാണ് വ്യാജമായി മരിച്ചെന്ന് വരുത്തിതീർത്ത് കേസിൽനിന്നും രക്ഷപ്പെടാൻ രാജ്ഭറിനെ ഉപദേശിച്ചത്. കൊലപാതക കേസിൽ നിന്ന് രാജ്ഭർ രക്ഷപ്പെട്ടാൽ തങ്ങളുടെ തുക തിരിച്ചുകിട്ടും എന്നും ഡോക്ടർമാർ വിശ്വസിച്ചിരുന്നു.

 

അബോധാവസ്ഥയിൽ രാജ്ഭറിനെ ആശുപത്രിയിൽ കൊണ്ടുപോയി കാണിച്ച് രേഖകൾ തയാറാക്കിയ ശേഷം മരിച്ചെന്ന് വരുത്തിതീർത്താണ് ശവസംസ്കാര ചടങ്ങ് നടത്തിയത്. ഇതിനായി ചിതയിൽ കിടക്കുന്ന ചിത്രം എഐ സഹായത്തോടെ നിർമിക്കുകയും ശേഷം ഒരു ആടിനെ ചിതയിൽ വച്ച് സംസ്കാരം നടത്തുകയും ചെയ്തു. ശേഷം രാജ്ഭറിന്റെ പേരിൽ മരണ സർട്ടിഫിക്കറ്റ് നേടി മരിച്ചുവെന്ന് കാട്ടി പൊലീസിനെ സമീപിച്ചു.

 

തുടർന്ന് പ്രതിയായ രാജ്ഭർ 18 മാസത്തോളം ഒളിവിൽ കഴിഞ്ഞു. എന്നാൽ പൊലീസ് രാജ്ഭറിന്റെ മരണം അപ്പാടെ വിശ്വസിച്ചിരുന്നില്ല. ഒളിവിൽ പോയ പ്രതിക്കുവേണ്ടി നിരീക്ഷണം നടത്തിയ പൊലീസ് ‍ഞായറാഴ്ച രാജ്ഭറിനെ അറസ്റ്റ് ചെയ്തു. വ്യാജരേഖ ചമച്ചതിനു പ്രതിക്കെതിരെ പൊലീസ് പുതിയ കേസും റജിസ്റ്റർ ചെയ്തു.