മുംബൈ: ഓഹരി വിപണിയില്‍ കുതിച്ചുചാട്ടം. ഈ വാരത്തിന്റെ തുടക്കമായ തിങ്കളാഴ്ച വ്യാപാരത്തിന്റെ ആരംഭത്തില്‍ തന്നെ സെന്‍സെക്‌സ് 1000ലധികം പോയിന്റ് ആണ് മുന്നേറിയത്. 75,000ന് മുകളിലാണ് സെന്‍സെക്‌സ്. നിഫ്റ്റി 23,300 എന്ന സൈക്കോളജിക്കല്‍ ലെവലിന് മുകളിലാണ്.

 

 

ആഗോള വിപണിയില്‍ എണ്ണവില കുറഞ്ഞതും റിലയന്‍സ് ഇന്‍ഡസ്ട്രീസിന്റെ സെപ്റ്റംബര്‍ പാദ ഫല കണക്കുകള്‍ പ്രതീക്ഷിച്ചതിനേക്കാള്‍ മികച്ചതായതുമാണ് വിപണിയില്‍ പ്രതിഫലിച്ചത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 110 ഡോളറില്‍ താഴെയാണ്. ഇന്ന് മാത്രം മൂന്ന് ശതമാനത്തിലധികമാണ് താഴ്ന്നത്. ഇന്ന് ഓഹരി വിപണിയുടെ തുടക്കത്തില്‍ തന്നെ നിക്ഷേപര്‍ക്ക് 3.5 ലക്ഷം കോടി രൂപയുടെ നേട്ടമാണ് ഉണ്ടായത്.

 

റിലയന്‍സ് ഇന്‍ഡസ്ട്രീസ് തന്നെയാണ് ഏറ്റവുമധികം നേട്ടം ഉണ്ടാക്കിയ ഓഹരി. ആറുശതമാനമാണ് ഇന്ന് ഉയര്‍ന്നത്. വിദേശ നിക്ഷേപകര്‍ വെള്ളിയാഴ്ച 3598 കോടിയുടെ ഓഹരികളാണ് വാങ്ങിക്കൂട്ടിയത്. റിലയന്‍സിന് പുറമേ ഭാരതി എയര്‍ടെല്‍, എച്ച്ഡിഎഫ്‌സി ബാങ്ക്, മാക്‌സ് ഹെല്‍ത്ത്‌കെയര്‍, ഇന്‍ഫോസിസ് ഓഹരികളും നേട്ടം ഉണ്ടാക്കി.